ހަށިވިއްކުމުގެ ވިޔަފާރީގައި ހަރަކާތްތެރިވި 7 ބިދޭސީން ހައްޔަރުކޮށް 2 މީހުން ޑީޕޯޓުކޮށްލައިފި

އިމިގްރޭޝަނުނުން އާއްމުކުރި މައުލޫމާތު / ފޮޓޯ: އިމިގްރޭޝަން

ރާއްޖޭގައި ފުޅާ ދާއިރާއެއްގައި ހަށިވިއްކުމުގެ ވިޔަފާރި ކުރަމުންދިޔަ ނެޓްވޯކުތަކެއް އަތުލައިގަނެ، އެ ކަމުގައި ހަރަކާތްތެރިވި 7 މީހަކު ހައްޔަރުކޮށް ދެ ބިދޭސީން ޑީޕޯޓުކޮށްފިއެވެ.

މޯލްޑިވްސް އިމިގްރޭޝަނުން މިއަދު އެ އިދާރާގެ ސޯޝަލް މީޑިއާގައި އާންމުކުރި ޕޯސްޓެއްގައި ބުނެފައިވަނީ ހަށިވިއްކުމުގެ ވިޔަފާރި ކުރާ ބިދޭސީން ހޯދަން ހިންގި އިންސްޕެކްޝަންތަކެއްގައި ހަތް ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށެވެ.

އިމިގްރޭޝަނުން ހާމަކުރި މަޢުލޫމާތުގައިވާ ގޮތުން، މި އޮޕަރޭޝަންތަކުގައި އިމިގްރޭޝަންގެ ބެލުމުގެ ދަށަށް ގެންގޮސްފައިވަނީ ހަތަރު އަންހެނުންނާއި ތިން ފިރިހެނުންނެވެ. މީގެ ތެރެއިން ދެ އަންހެނުން މިހާރު ވަނީ ޑީޕޯޓުކޮށްލާފައެވެ. އެއީ ރަޝިއާ އާއި އުގަންޑާއަށް ނިސްބަތްވާ ދެ އަންހެނުންނެވެ.

ބާކީ ތިބި ފަސް މީހުން ޑީޕޯޓުކުރުމުގެ މަސައްކަތް މިހާރު ދަނީ ކުރަމުންނެވެ. މި ފަސް މީހުންގެ ތެރޭގައި ހިމެނެނީ ބަންގްލަދޭޝްގެ ތިން ފިރިހެނުންނާއި އެއް އަންހެނަކާއި، ރަޝިއާގެ އެއް އަންހެނެކެވެ.

މާލެ ސަރަހައްދުގައި ހަށިވިއްކުމަށް މަސާޖު ޕާލާތަކުގެ ނަމުގައި 111 ތަން ހިންގާ ކަމަށާއި އެފަދަ ތަންތަން ހުއްޓުވުމަށް ހާއްސަ މަސައްކަތްތަކެއް ކުރަމުންދާ ކަމަށް ހޯމްލޭންޑް މިނިސްޓަރު އަލީ އިހުސާން ވަނީ މިދިޔަ ފެބްރުއަރީ މަހު ވިދާޅުވެފައެވެ. މިފަދަ ކަންކަން ހުއްޓުވުމަށް ސަރުކާރުން އަޅަމުންދާ ފިޔަވަޅުތަކުގެ ތެރޭގައި، މިފަދަ ކަންކަމުގައި ހައްޔަރުކުރެވޭ ބިދޭސީން ވަގުތުން ޑީޕޯޓުކުރުން ހިމެނެއެވެ.

މޯލްޑިވްސް އިމިގްރޭޝަން