ޕޮލިސް ކާރުގައި ސައިކަލެއް ޖެހުން: މަންޒަރު ދުށް ބަޔަކު ވޭތޯ ބަލަނީ

ހުޅުމާލެ ދެ ވަނަ ފިޔަވަހީގައި ސައިކަލަކާއި ފުލުހުންގެ ކާރެއް ޖެހި މިދިޔަ މަހު ހިނގި ނުރައްކާތެރި އެކްސިޑެންޓުގެ މަންޒަރު ފެނުނު ބަޔަކު ވޭތޯ ބަލަން އާއްމުންގެ އެހީއަށް ފުލުހުން އެދިއްޖެ އެވެ.

މި އެކްސިޑެންޓު ހިނގީ މިދިޔަ ޑިސެމްބަރު މަހުގެ 27 ވަނަ ދުވަހުގެ ރޭ މެންދަމުން އަލިވެ، 1:45ހާއިރު ހުޅުމާލޭ ދެވަނަ ފޭހުގެ ނިރޮޅުމަގާއި ގުލްއަލާމާހިނގުން ގުޅޭ ހިސާބުގަ އެވެ.

ފުލުހުން ބުނީ އެކްސިޑެންޓް ހިނގި ވަގުތު ސައިލް ދުއްވަން އިން ޒުވާނާއަށް ސީރިއަސް އަނިޔާތަކެއްވެފައިވާ ކަމަށެވެ.

އަނިޔާވި ޒުވާނާއަށް ފަރުވާ ދިނުމަށް ފުރަތަމަ ގެންދިޔައީ ހުޅުމާލޭ ހޮސްޕިޓަލަށެވެ. އޭގެ ފަހު ހާލު އިތުރަށް ސީރިއަސް ވެގެން މިހާރު ވަނީ އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް)އަށް ބަދަލުކޮށްފަ އެވެ. އޭނާއަށް މިވަގުތު ފަރުވާދެމުން އަންނަނީ ވެންޓިލޭޓަރުގެ އެހީގަ އެވެ.

ފުލުހުން އެދިފައި ވަނީ މި އެކްސިޑެންޓު ހިނގި ވަގުތު މަންޒަރު ދުށް ނުވަތަ އެ އެކްސިޑެންޓާ ގުޅޭ އެއްވެސް މައުލޫމާތެއް ލިބިފައިވާ ނަމަ، ޓްރެފިކް އިންވެސްޓިގޭޝަންގެ ނަންބަރު 9444880 އަށް ގުޅައި އެ މައުލޫމާތު ހިއްސާކުރުމަށެވެ.

އެކްސިޑެންޓް ހިނގުމުގައި ޕޮލިސް ކާރު ދުއްވި އޮފިސަރުގެ އެއްވެސް އިހުމާލެއް ވޭތޯ ފުލުހުން އަންނަނީ ބަލަމުންނެވެ.

ފުލުހުން މައުލޫމާތު ދިން ގޮތުގައި، ސައިކަލް ދުއްވަން އިނީ ލައިސަންސް ނެތް އުމުރުން 18 އަހަރުގެ ޒުވާނެކެވެ.