ގައްޒާގެ އުތުރުގައި ހުރި ހޮސްޕިޓަލްތަކުގެ ހިދުމަތް މެދުކެނޑިއްޖެ

އިސްރާއިލުން ދަނީ ޣައްޒާގެ ހޮސްޕިޓަލުތަކަށް ވެސް ހަމަލާތައް ދެމުން

ޣައްޒާގެ އުތުރުގައި ހުރި މައި ތިން ހޮސްޕިޓަލް ކަމަށްވާ ކަމާލް އަދުވާން، ބެއިތް ހަނޫން އަދި އިންޑޮނޭޝިއާ ހޮސްޕިޓަލްގެ ޚިދުމަތްތައް އިސްރާއީލުގެ ހަމަލާތަކުގެ ސަބަބުން މެދުކެނޑިފައިވާ ކަމަށް ޣައްޒާގެ ސިއްޚަތާބެހޭ ވުޒާރާއިން ބުނެފިއެވެ.

މީގެ ތެރެއިން ކަމާލް އަދުވާން ހޮސްޕިޓަލަށް އިސްރާއީލުން ވަނީ ބޮޑެތި ގެއްލުންތަކެއް ދީފައެވެ.

އިސްރާއީލުން ހޮސްޕިޓަލްތަކަށް ދޭ ހަމަލާތައް ބައިނަލްއަޤްވާމީ ފަރާތްތަކުން ވަނީ ކުށްވެރިކޮށްފައެވެ. އދ.ގެ އިންސާނީ ހައްގުތަކާ ބެހޭ ވެރިޔާ ވޯލްކާ ޓާކް ވިދާޅުވެފައިވަނީ ޣައްޒާގައި ހަނގުރާމަވެރިން ހޮސްޕިޓަލްތައް ބޭނުން ކުރަމުންދާ ކަމަށް އިސްރާއީލުން ބުނާ ގިނަ ވާހަކަތައް ސާބިތު ކުރެވިފައިނުވާ ކަމަށެވެ.

އދގެ ހައިކޮމިޝަނާ ފޯ ހިއުމަން ރައިޓްސްގެ ރިޕޯޓެއްގައި ބުނެފައިވާ ގޮތުގައި ފާއިތުވި އަށް މަސް ދުވަހުގެ ތެރޭގައި އިސްރާއީލުގެ ސިފައިން ވަނީ 27 ހޮސްޕިޓަލަކާއި 12 މެޑިކަލް ފެސިލިޓީއަކަށް 136 އަށް ވުރެ ގިނަ ވައިގެ ހަމަލާދީފައެވެ.

މިދިޔަ އަހަރުގެ އޮކްޓޫބަރު 7 އިން ފެށިގެން އިސްރާއީލުން ޣައްޒާއަށް ދެމުންގެންދާ ހަމަލާތަކުގައި މިހާތަނަށް ފަލަސްތީނުގެ 45،658 މީހުން ވަނީ ޝަހީދުކޮށްލާފައެވެ. އަދި 108،583 މީހުން ވަނީ ޒަޚަމްވެފައެވެ. މި ހަމަލާތަކާ ގުޅިގެން އދ.ގެ ސަލާމަތީ މަޖިލީހުން ވަނީ ކުއްލި ބައްދަލުވުމެއްވެސް ބާއްވާފައެވެ.

އިސްރާޢީލް ފަލަސްތީން