މިޔަންމާއިން މެލޭޝިއާއަށް ވަނުމަށް އުޅުނު 300 މީހުން ތިބި ދެ ބޯޓު ބޭރުކޮށްފި

މިޔަންމާއިން ގަވާއިދާ ހިލާފަށް މެލޭޝިއާއަށް އެތެރެވާން މަސައްކަތްކުރި ގާތްގަނޑަކަށް 300 މީހުން ތިބި ދެ ބޯޓެއް މެލޭޝިއާގެ ކަނޑުގެ ސަރަހައްދުން ބޭރުކޮށްފައިވާ ކަމަށް މެލޭޝިއާގެ މެރިޓައިމް އެންފޯސްމަންޓް އެޖެންސީ (އެމްއެމްއީއޭ) އިން ބުނެފިއެވެ.

އެމްއެމްއީއޭ އިން މަޢުލޫމާތު ދީފައިވާ ގޮތުގައި މި ބޯޓުތައް ފެނިފައިވަނީ ހުކުރު ދުވަހުގެ ރޭ، އުތުރުގެ ރިސޯޓެއް ކަމަށްވާ ލަންގްކާވީގެ ހުޅަނގު ދެކުނުން ދެ ނޯޓިކަލް މޭލު (3.7 ކިލޯމީޓަރު) ދުރުންނެވެ.

އެމްއެމްއީއޭގެ ޑިރެކްޓަރ ޖެނެރަލް މުހައްމަދު ރޮސްލީ އަބްދުﷲ ނެރުއްވި ބަޔާނެއްގައި ވިދާޅުވެފައިވަނީ އެ ބޯޓުތަކުގެ ދަތުރު ކުރިއަށް ގެންދިއުމަށް ކަނޑުގެ ބޯޑަރުން އެ ބޯޓުތައް ނެރުމަށް ފަހު ކާބޯތަކެއްޗާއި ސާފު ބޯފެން ފޯރުކޮށްދީ އެމްއެމްއީއޭ އިން އެހީތެރިކަން ފޯރުކޮށްދީފައިވާ ކަމަށެވެ.

މީގެ އިތުރުން، ތައިލެންޑުގެ ކަމާބެހޭ ފަރާތްތަކާ ގުޅިގެން މި ބޯޓުތަކުގެ ހަރަކާތްތަކާ ބެހޭ އިތުރު މަޢުލޫމާތު ހޯދުމުގެ މަސައްކަތް ވެސް ކުރަމުން އަންނަ ކަމަށް ޑިރެކްޓަރ ޖެނެރަލް ވިދާޅުވެފައިވެއެވެ.

މިދިޔަ ހުކުރު ދުވަހު މެލޭޝިއާގެ ލަންގްކާވީއަށް ރޮހިންޖާ ދަރިކޮޅުގެ މީހުންގެ ބޯޓެއް ލައްވުމުން އެ ގައުމުގެ ފުލުހުން ވަނީ އެ 200 އެއްހާ މީހުން ހިފަހައްޓައިފައެވެ. ބުޑިސްޓުންގެ އަޣުލަބިއްޔަތު އޮންނަ މިޔަންމާގައި ރޮހިންޖާ ދަރިކޮޅުގެ މުސްލިމުންނަށް އަނިޔާލިބެމުންދާއިރު، ގިނަ ބަޔަކު ފިލައިގެން ދަނީ މުސްލިމުންގެ އަޣުލަބިއްޔަތު އޮންނަ މެލޭޝިއާ ނުވަތަ ބަންގްލަދޭޝްގެ ރެފިއުޖީ ކޭމްޕްތަކަށެވެ.

މިފަދަ އެތައް ހާދިސާތަކެއް މިފަހަކުން ހިނގާފައިވާކަމަށް މެލޭޝިއާގެ ކަމާބެހޭ ފަރާތްތަކުން ހާމަކުރައްވައެވެ.