ބާސެލޯނާ އިން ފަސޭހަކަމާއިއެކު ކޮޕަ ޑެލް ރޭގެ ގަދަ 16 އަށް ދަތުރުކޮށްފި

ބާސާއިން ވަނި ރޭގެ މެޗު ފަސޭހަކަމާއިއެކު ކާމިޔާބުކޮށްފައި

ބާސެލޯނާ އިން ފަސޭހަކަމާއިއެކު ސްޕެއިނުގެ ހަތަރު ވަނަ ޑިވިޝަނުގެ ބާބަސްޓްރޯ އަތުން 4-0 އިން މޮޅުވެ، ސްޕެނިޝް ކޮޕަ ޑެލް ރޭގެ ގަދަ 16 ބުރުން ފުރުސަތު ހޯދައިފިއެވެ.

ބާސެލޯނާގެ ކޯޗު ހަންސީ ފްލިކް މި މެޗަށް ނެރުނީ ނިސްބަތުން ވަރުގަދަ ފުރަތަމަ އެގާރައެކެވެ. މިއީ އާ އަހަރަށް ސްޕެނިޝް ލީގު މެދުކަނޑާލިއިރު، އެންމެ ފަހުން ކުޅުނު މެޗުތަކުގައި ނަތީޖާ ދަށްވުމުން އެޅި ފިޔަވަޅެއްކަމަށް ބެލެވެއެވެ.

މެޗުގެ 21 ވަނަ މިނިޓުގައި ބާސެލޯނާ އަށް ލީޑުނަގައިދިނީ އެރިކް ގާސިއާއެވެ. އޭގެ 11 މިނިޓް ފަހުން، ރޮބަޓް ލެވަންޑޯސްކީ ވަނީ ބާސެލޯނާގެ ލީޑު ފުޅާކޮށްދީފައެވެ. ދެވަނަ ހާފުގައި ލެވަންޑޯސްކީ އޭނާގެ ދެވަނަ ގޯލު ގޯލު ޖަހައިދިނެވެ. މެޗުގެ 56 ވަނަ މިނިޓުގައި، ބާސެލޯނާގެ ހަތަރުވަނަ ގޯލު ޖެހީ ޕަބްލޯ ޓޯރޭއެވެ.

ކޮޕަ ޑެލް ރޭގެ އެންމެ ކާމިޔާބު ޓީމު ކަމަށްވާ ބާސެލޯނާ އިން 31 ފަހަރު އެ ތަށި ހޯދާފައިވާއިރު، އެންމެ ފަހުން މި މުބާރާތް ކާމިޔާބުކުރީ 2021 ވަނަ އަހަރުއެވެ. މި މޮޅުމާއެކު ބާސެލޯނާ ވަނީ މި އަހަރުގެ މުބާރާތުގެ ގަދަ 16 ބުރަށް ކޮލިފައިވެފައެވެ.

ރޭގެ މެޗުން ބާސާ މޮޅުވެފައިވާ އިރު ލަލީގާގައި އެޓީމުން އެންމެފަހުން ކުޅުނު މެޗުތަކުން ރަނގަޅު ނަތީޖާތަކެއް ނު ނެރެވުމުން އެޓީމަށް މިހާރުވަނީ ތާވަލުގެ އެއްވަނަ މަގާމުވެސް ގެއްލިފައެވެ. އެހެންކަމުން ރޭގެ މި މޮޅަކީ އެޓީމު ހަމައެކަށް އެޅުމަށް ލިބުނު ރަނގަޅު ނަތީޖާއެއްކަމަށް ގިނަ ބަޔަކު ގަބޫލުކުރެއެވެ.

ބާސެލޯނާ