ލޯފަން މީހުންގެ ހައްގުގައި ކުރާ މަސައްކަތަށް ރައީސް ތައުރީފު ކުރައްވައިފި

ލޮލަށް ފެނުމުގެ ނުކުޅެދުންތެރިކަން ހުންނަ ފަރާތްތަކުގެ ހައްގުތަކަށް ވަކާލާތު ކުރުމަށް ކުރާ މަސައްކަތަށް ރައީސް ޑރ. މުޙައްމަދު މުއިއްޒު ތައުރީފު ކުރައްވައިފި އެވެ.

ރައީސް އެފަދައިން ތައުރީފު ކުރެއްވީ، ދުނިޔޭގެ ބްރެއިލް ދުވަސް ފާހަގަ ކުރުމުގެ ގޮތުން، މިއަދު އާންމު ކުރެއްވި މެސެޖެއްގަ އެވެ.

މިމެސެޖުގައި، ބްރެއިލްގެ އީޖާދީ، އިންގިލާބީ ބަދަލާއެކު ލޮލަށް ފެނުމުގައި ދަތިކަން ހުންނަ ފަރާތްތައް ބާރުވެރި ކުރުމުގައި ބްރެއިލް އަދާ ކުރި މުހިންމު ދައުރަށް އެމަނިކުފާނު ވަނީ އަލިއަޅުއްވައިލައްވާފަ އެވެ.

އަދި، ބްރެއިލަކީ އެފަދަ ފަރާތްތަކަށް މުޖުތަމައުގައި ކުރިމަތިވާ ހިރާސްތައް ނައްތާލުމަށް ލިބުނު ބާރުގަދަ ވަސީލަތެއް ކަމަށާއި އޭގެ ސަަބަބުން، އެފަދަ ފަރާތް ތަކަކީ ގައުމީ ތަރައްގީގައި ފުރިހަމަ ބައިވެރިންނަށް ވެގެންދާ ކަަމަށް ވެސް ރައީސް ފާހަގަ ކުރެއްވި އެވެ.

ރައީސްގެ މެސެޖުގައި ލޮލަށް ފެނުމުގެ ނުކުޅެދުންތެރިކަން ހުންނަ ފަރާތްތަކުގެ ހައްގު ތަކަށް ވަކާލާތު ކުރުމުގައި މަސައްކަތް ކުރާ ފަރާތް ތަކަށް ޝުކުރު އަދާކުރައްވާފައިވެ އެވެ.

އެމަނިކުފާނު ވަނީ ފެނުމުގެ ނުކުޅެދުންތެރިކަން ހުންނަ ފަރާތް ތަކަށް އެކަށީގެންވާ ހިދުމަތްތަކާއި ވަސީލަތްތައް ފަރުމާކޮށް، ފަސޭހައިން ލިބޭނެ ގޮތް ހަމަޖެއްސުމަކީ ކޮންމެ ގައުމެއްގެ ވެސް އަސާސީ ޒިންމާއެއްކަން ފާހަގަ ކުރައްވާފަ އެވެ. އަދި، މިއަދުގެ ސަރުކާރަކީ މުޖުތަމަައުގެ މިފަދަ ޒަރޫރީ ބޭނުންތަކަށް ރިއާޔަތްކޮށް، ސިޔާސަތުތައް ތަންފީޒު ކުރަމުން ދާނޭ ސަރުކާރެއް ކަމަށް ވެސް ރައީސް ވިދާޅުވިއެވެ.

ރައީސްގެ މެސެޖު ނިންމަވާލައްވާފައި ވަނީ، ނުކުޅެދުންތެރިކަން ހުންނަ މީހުން ބާރުވެރި ކުރުމާއި، މުޖުތަމައުގައި އެފަދަ ފަރާތްތަކުގެ ދައުރު އިތުރުކުރުމާއި، ކަރާމާތްތެރިކަމާއެކު ދިރިއުޅުމަށް އެހީތެރިވެވޭ ގޮތަށް ދައުލަތުގެ ސިޔާސަތުތައް ބައްޓަށް ކުރުމަށް ސަރުކާރުން އިސްކަންދެއްވާނެކަން ތަކުރާރު ކުރައްވަމުންނެވެ.