މާލޭގައި ފެންބޮޑުވުމާ ގުޅިގެން ބަރު އުޅަނދު ނުދުއްވުމަށް ފުލުހުން އިލްތިމާސްކޮށްފި

ބޯކޮށް ވާރެވެހި މުޅި މާލޭގައި ވަނީ ފެންބޮޑުވެފައި

މާލެއަށް ބޯކޮށް ވާރޭވެހި މަގުތަކުގައި ފެންބޮޑުވެފައިވާތީ، އާއްމު ހާލަތަށް ބަދަލުވަން ދެން މަގުތަކުގައި ބަރު އުޅަނދު ނުދުއްވަން ފުލުހުން އިލްތިމާސްކޮށްފި އެވެ.

ފުލުހުން ނެރުނު އެލާޓުގައި ބުނެފައިވަނީ މަގުތަކުގައި ފެން ބޮޑުވެ، ބައެއް ގޭގެއަށް ފެން ވަނުމުގެ ހާދިސާތައް ހިނގަމުންދާ ކަމަށެވެ.

މެދުނުކެނޑި ވެހެމުންދާ ބޯ ވާރޭގައި މުޅި މާލޭގައި ވަނީ ފެންބޮޑުވެފައެވެ. ބައެއް ގޭގެއާއި ފިހާރަތަކަށް ފެން ވަދެގެން ފުލުހުންނާއި ސިފައިން ދަނީ އެ ތަންތަނުގައި ވެލި ބަސްތާ ޖެހުމުގެ މަސައްކަތް ކުރަމުންނެވެ.

ފުލުހުން ވަނީ ފެންގަނޑު ހިނދި، އާއްމު ހާލަތަށް ބަދަލުވަންދެން ބަރު އުޅަނދު ނުދުއްވުމަށް އެދިފައެވެ. އަދި ކޮންމެހެން ބޭނުން ޖެހިގެން ނޫން ގޮތަކަށް ހަތަރު ފުރޮޅުލީ އުޅަނދު ނުދުއްވުމަށް ވެސް އިލްތިމާސްކޮށްފައިވެއެވެ.

ވިއްސާރައާ ގުޅިގެން ރާއްޖޭގެ ބޮޑު ބަޔަކަށް ވަނީ އެލާޓް ނެރެފައެވެ. އޭގެ ތެރެއިން، ހއ. އަތޮޅުން ފެށިގެން ރ. އަތޮޅުގެ ހިސާބަށް ހުދު އެލާޓް އަދި ބ. އަތޮޅުން ފެށިގެން ތ. އަތޮޅުގެ ރަށްތަކަށް މެޓުން ވަނީ މިރޭ 11:00 ޖަހަންދެން ރީނދޫ އެލާޓް ނެރެފައެވެ.

މި ހާލަތާ ގުޅިގެން، ކަމާބެހޭ އިދާރާތަކުން ވަނީ ރައްޔިތުންނަށް ސަލާމަތްތެރިކަމަށް އިސްކަންދިނުމަށް އިލްތިމާސްކޮށްފައެވެ. އަދި މޫސުމަށް އަންނަ ބަދަލުތަކާ ގުޅޭ އެންމެ ފަހުގެ މަޢުލޫމާތު ހޯދުމަށް އާންމުންނަށް އިރުޝާދު ދީފައިވެއެވެ.

މޫސުން ފުލުހުން