އިންޑިއާގެ ހިލޭ އެހީގައި ތަރައްގީގެ މަޝްރޫއު ހިންގަން އެއްބަސް ވެއްޖެ

ރާއްޖޭގައި ތަރައްގީގެ މަޝްރޫއު ހިންގުމަށް އިންޑިއާ ސަރުކާރުގެ ހިލޭ އެހީ ދިނުމުގެ އެއްބަސްވުމުގައި މިއަދު ސޮއިކޮށްފި އެވެ.

މި އެއްބަސްވުމުގައި ސޮއިކޮށްފައި ވަނީ ފޮރިން މިނިސްޓަރު ޑރ. އަބްދުﷲ ހަލީލް އިންޑިއާއަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ދިއްލީގައި ބޭއްވި ރަސްމީ މަޝްވަރާތަކަށްފަހު އެވެ.

ރާއްޖޭގެ ފަރާތުން އެއްބަސްވުމުގައި ސޮއިކުރެއްވީ ހަލީލެވެ. އިންޑިއާގެ ފަރާތުން ސޮއިކުރެއްވީ އެ ގައުމުގެ އެކްސްޓާނަލް އެފެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރެވެ.

އެކަމަކު މި އެއްބަސްވުމާ ގުޅޭ އިތުރު ތަފުސީލް ދެ ގައުމުން ކުރެ ގައުމަކުން ހާމަކޮށްފައެއް ނުވެ އެވެ.

ނިއުދިއްލީގައި ރޭ ބޭއްވި ބައްދަލުކުރެއްވުމުގައި ހަލީލް ވަނީ މިހާރު ކުރިމަތިވެފައިވާ މާލީ ދަތިތަކުން އަރައިގަތުމުގައި ރާއްޖެއަށް އިންޑިޔާ ސަރުކާރުން ފޯރުކޮށްދެމުންދާ އެހީތެރިކަމަށް ޝުކުރު އަދާކުރައްވާ އަދި އެ ދަތުރުފުޅުގެ ސަބަބުން ދެ ގައުމުގެ ގުޅުން އިތުރަށް ބަދަހިވާނެ ކަމަށް އުންމީދުކުރައްވާ ކަމުގައި ވިދާޅުވެފަ އެވެ.

މި ބައްދަލުކުރެއްވުމުގައި ޖައިޝަންކަރު ވިދާޅުވީ އިންޑިއާގެ ނެއިބަހުޑް ފަސްޓް ޕޮލިސީގެ ދަށުން ރާއްޖެއަށް އެހީތެރިކަން ފޯރުކޮށްދިނުމުގައި އެ ގައުމުން އަބަދު ވެސް އޮންނާނެ ކަމަށެވެ.

ޖައި ޝަންކަރު ވިދާޅުވީ އިގުތިސާދީ ގޮތުން އުނދަގޫ މި ދަނޑިވަޅުގައި ވެސް އިންޑިއާގެ މާލީ އެހީތެރިކަން ރާއްޖެއަށް ފޯރުކޮށްދީފައިވާ ކަން ފާހަގަ ކުރައްވަމުން އެ މަނިކުފާނު ވިދާޅުވީ އެގޮތުން ރާއްޖެއަށް ބޭނުންވާ އަސާސީ މުދަލުގެ ބާވަތްތައް ދަތިކަމެއް ނެތި އިންޑިއާއިން ފޯރުކޮށްދެމުންދާ ކަމަށެވެ.