ބޯކޮށް ވާރޭ ވެހި އުތުރުގެ ބައެއް ރަށްރަށުގައި ފެންބޮޑުވެ އުދަ އަރައިފި

ރާއްޖެއަށް މިހާރު ކުރަމުންދާ ވިއްސާރައިގައި އުތުރުގެ ބައެއް ރަށްތަކުގައި ފެންބޮޑުވުމާއި އުދެއެރުމުގެ ޙާދިސާތައް ހިނގައިގެން ރިޕޯޓްކޮށްފައިވާކަމަށް ނެޝެނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ވިދާޅުވެއްޖެއެވެ.

އެންޑީއެމްއޭއިން މަޢުލޫމާތު ދެއްވިގޮތުގައި، ރޭގެ ވަގުތުތަކުން ފެށިގެން ރާއްޖޭގެ ބައެއް ރަށްތަކަށް އުދަ އަރަމުންދާކަމަށާއި، ބޯކޮށް ވާރޭ ވެހުމުގެ ސަބަބުން ބައެއް ރަށްރަށުގައި ފެން ބޮޑުވަމުންދާކަމަށް މައުލޫމާތު ލިބެމުންދެއެވެ.

މިހާތަނަށް ލިބިފައިވާ މަޢުލޫމާތުތަކަށް ބަލާއިރު، ބޯކޮށް ވާރޭ ވެހުމާއި އުދަ އެރުމުގެ ސަބަބުން 6 ރަށެއްގައި ފެންބޮޑުވެގެން ވަނީ ރިޕޯޓްކޮށްފައެވެ. މީގެ ތެރެއިން އުދައަރައިގެން ރިޕޯޓްކޮށްފައިވަނީ ށ. ނަރުދޫ އަދި ރ. އިނގުރައިދޫއިންނެވެ. އަދި ވާރޭ ވެހި ފެންބޮޑުވެގެން ދ. ކުޑަހުވަދޫ، ދ. މީދޫ، ފ. ނިލަންދޫ އަދި ފ. މަގޫދޫއިން ވަނީ ރިޕޯޓްކޮށްފައެވެ.

ށ. ނަރުދޫގައި އުދަ އެރުމުގެ ސަބަބުން ބައެއް ގެދޮރުތަކަށް ގެއްލުން ވެގެން މިހާތަނަށް 4 ގެޔަކުން ރިޕޯޓްކޮށްފައިވާކަމަށް އެންޑީއެމްއޭއިން ވިދާޅުވެއެވެ. އެ ރަށަށް އުދައަރައި ރަށުތެރޭގައި ފެންބޮޑުވެފައިވާތީ އެހީތެރިކަން ފޯރުކޮށްދިނުމުގައި، އެމްއެންޑީއެފް ނޮދަން އޭރިއާ ކޮމާންޑުގެ ސިފައިންވެސް ދަނީ ހަރަކާތްތެރިވަމުންނެވެ.

ދ. އަތޮޅުގެ ދެ ރަށެއްގައިވެސް ފެން ބޮޑުވުމުގެ މައްސަލަ ރިޕޯޓްކޮށްފައިވެއެވެ. ދ. ކުޑަހުވަދޫއާއި ދ. މީދޫގައި ފެން ބޮޑުވެ 10 އަކަށްވުރެ ގިނަ ގެއަށް ފެންވަދެގެން ހިފައި ގެންގުޅޭ ތަކެއްޗަށް ގެއްލުން ލިބިފައިވާކަމަށް ރިޕޯޓްކޮށްފައިވެއެވެ. އެހެންނަމަވެސް އެއްވެސް ގެއަކުން މީހުން ނެރެންޖެހޭފަދަ ހާލަތަކަށް ގޮސްފައިނުވާކަމަށް އެންޑީއެމްއޭއިން ވިދާޅުވިއެވެ.

މީގެ އިތުރުން ފ. ނިލަންދޫއަށާއި އދ. މާމިގިއްޔަށްވެސް ބޯކޮށް ވާރޭވެހި ބައެއް ގޭގޭގައި ފެން ބޮޑުވެގެން، އެހީތެރިކަން ފޯރުކޮށްދިނުމުގައި އެމްއެންޑީއެފްއިން ދަނީ ހަރަކާތްތެރިވަމުންނެވެ. މި ހާލަތާ ގުޅިގެން އެންޑީއެމްއޭއިން ވަނީ ރައްޔިތުންނަށް ސަލާމަތްތެރިކަމަށް އިސްކަންދިނުމަށާއި، މޫސުމަށް އަންނަ ބަދަލުތަކާ ގުޅޭ އެންމެ ފަހުގެ މަޢުލޫމާތު ހޯދުމަށް އިލްތިމާސްކޮށްފައެވެ.