ވައި ގަދަކަމުން ވީއައިއޭއަށް ޖެއްސި ފުލައިޓު ތަކަށް ދަތިތަކާ ކުރިމަތިވެއްޖެ

ވިއްސާރަވެ، ވައިގަދަވުމާ އެކު ވެލާނާ އިންޓަނޭޝަނަލް އެއާޕޯޓު (ވީއައިއޭ)އަށް މިއަދު ޖައްސަން އައި ބައެއް މަތިންދާބޯޓުތަކަށް ނުޖެއްސި މަޑުކުރަން ޖެހި ދަތިތަކަކާ ކުރިމަތިވެއްޖެއެވެ.

މޫސުން ގޯސްވުމާ ގުޅިގެން މޫސުމާ ބެހޭ ގައުމީ އިދާރާ މެޓް އޮފީހުން ވަނީ ވީއައިއޭ ހިމެނޭހެން މެދުރާއްޖެތެރެއަށް މިއަދުގެ 15:00 އަށް ރީނދޫ ސަމާލެއް ނެރެފައެވެ.

މެޓް އޮފީހުން ލަފާކޮށްފައިވާ ގޮތުގައި، އެ ސަރަހައްދުގައި ވިލާގަނޑުގައި ގަޑިއަކު 45 މޭލަށް ވައިގަދަވާނެ އެވެ. ފްލައިޓް ރާޑާއިން ދައްކާ ގޮތުގައި ބޭރުގެ ބޮޑެތި ބޯޓުތައް ވެސް ވަނީ ވީއައިއޭއަށް ނުޖެއްސި މަތީގައި މަޑުކުރަން ޖެހިފައެވެ. އެގޮތުން، ފްލައި ދުބާއީއާއި ސިންގަޕޯ އެއާލައިންސްގެ އިތުރުން މޯލްޑިވިއަންއިން މާވަރުލަށް ދަތުރުކުރި ފްލައިޓަށް ވެސް ވަނީ ޖެއްސޭނެ ގޮތެއްނުވެ، މަޑުކުރަން ޖެހިފައެވެ.

މޫސުން ގޯސްވުމުގެ އަސަރު އެހެން އެއަރޕޯޓުތަކަށް ވެސް ކުރަމުންދާކަން ފާހަގަކުރެވެ އެވެ. މިގޮތުން، މިއަދު މާމިގިލި އެއާޕޯޓަށް ދަތުރުކުރި ފްލައިމީގެ ބޯޓެއް ވެސް ވަނީ ޖެއްސޭތޯ، އެއް ގަޑިއިރު ހޭދަކުރުމަށް ފަހު އަނބުރާ ވީއައިއޭއަށް ދަތުރުކޮށްފައެވެ. އޭވިއޭޓާ މޯލްޑިވްސްއިން މައުލޫމާތުދޭ ގޮތުގައި ވައިގެ ބާރުމިން މިހާރު އުޅެނީ 35 ނޮޓިކަލް މޭލުގައެވެ. އަދި ވިޒިބިލިޓީ އުޅެނީ 2000 މީޓަރުގައެވެ.

މެޓް އޮފީހުން ވަނީ މިއަދު ބޯކޮށް ވާރޭވެހި ގުގުރާނެ ކަމަށް ލަފާކޮށް އިތުރު ސަމާލުތަކެއް ވެސް ނެރެފައެވެ. އެގޮތުން، މިއަދުގެ 11:15 އިން ފެށިގެން 15:00 އަށް ކ އަތޮޅުން ފެށިގެން ތ އަތޮޅަށް ރީނދޫ ސަމާލެއް ނެރެފައިވެ އެވެ. އަދި، އެވެ. އަދި، 10:30 އިން ފެށިގެން 16:30 އަށް ބ އަތޮޅުން ފެށިގެން ލ އަތޮޅަށް ހުދު ސަމާލު ނެރެފައިވާއިރު ބ އަތޮޅުން ފެށިގެން އައްޑޫ ސިޓީއާ ހަމައަށް 11:00 އިން ފެށިގެން 16:30 އަށް އެ ސަމާލު ދަންމާލާފައިވެ އެވެ.

މި ހާލަތާ ގުޅިގެން ދަތުރުފަތުރުކުރާ ފަރާތްތަކަށް ދަތިތަކާ ކުރިމަތިވަމުންދާއިރު، ކަމާބެހޭ އިދާރާތަކުން ވަނީ ރައްޔިތުންނަށް ސަލާމަތްތެރިކަމަށް އިސްކަންދިނުމަށް އިލްތިމާސްކޮށްފައެވެ. އަދި މޫސުމަށް އަންނަ ބަދަލުތަކާ ގުޅޭ އެންމެ ފަހުގެ މަޢުލޫމާތު ހޯދުމަށް އާންމުންނަށް އިރުޝާދު ދީފައިވެ އެވެ.