އިޓަލިއަން ސުޕަ ކަޕްގެ ފައިނަލަށް އިންޓަމިލާން ދަތުރު ކޮށްފި

އިޓާލިއަން ސުޕަ ކަޕްގެ ސެމީ ފައިނަލުގައި ރޭ ކުޅުނު މެޗުގައި އެޓަލަންޓާ 2-0 އިން ބަލިކޮށް އިންޓަ މިލާނުން މުބާރާތުގެ ފައިނަލަށް ދަތުރުކޮށްފި އެވެ.

ކިންގް ސައުދީ ޔުނިވާސިޓީ ސްޓޭޑިއަމްގައި ކުޅުނު މި މެޗުގައި އިންޓަގެ ދެ ގޯލު ވެސް ޖެހީ ޑެންޒެލް ޑަމްފްރީސް އެވެ.

މެޗުގެ ދެ ވަނަ ހާފުގައި ޖެހި މި ދެ ގޯލުން އިންޓަ އިން ވަނީ މުބާރާތުގެ ފައިނަލުން ޖާގަ ހޯދައިފަ އެވެ. މި މަހުގެ ހަ ވަނަ ދުވަހު ބާއްވާ ފައިނަލުގައި އިންޓަ އިން ބައްދަލުކުރާނީ ޔުވެންޓަސް އާއި އޭސީ މިލާން ކުޅޭ ސެމީ ފައިނަލުން މޮޅުވާ ޓީމަކާ އެވެ.

މި މެޗުގައި އެޓަލަންޓާގެ ބްރެޒިލް މިޑްފީލްޑަރު، އެޑާސަން ޖެހި ގޯލެއް ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ބަލައިނުގަތުމުން، އެޓަލަންޓާގެ ކޯޗު ޖިއަން ޕިއޭރޯ ގަސްޕެރިނީ ވަނީ ރެފްރީގެ ނިންމުންތަކާ މެދު ފާޑުކިޔައިފަ އެވެ. އޭނާ ބުނީ ވީއޭއާރްގެ ބޭނުން މި މެޗުގައި އެންމެ ރަނގަޅަށް ހިފިނަމަ މެޗުގެ ނަތީޖާ އަށް ބަދަލުތަކެއް އައުން އެކަށީގެންވާ ކަމަށެވެ.

އެޓަލަންޓާގެ ބައެއް ކުޅުންތެރިން ނުލައި މެޗު ފެށި ސަބަބު ބަޔާންކުރަމުން ގަސްޕެރިނީ ބުނީ ގާތްގާތުގައި ގިނަ މެޗުތަކެއް ކުޅެން ޖެހުމުން އަނިޔާގެ މައްސަލަތަކުން ކުޅުންތެރިން ސަލާމަތްކޮށްފައި ބެހެއްޓުމުގެ ގޮތުން ކަމަށެވެ.

އިންޓަގެ ކޯޗު ސިމޯން އިންޒާގީ ވަނީ އޭނާގެ ޓީމުގެ ކުޅުންތެރިން މި ނަތީޖާ ނެރެން ޓީމެއްގެ ގޮތުގައި ކުޅެން ކުރި މަސައްކަތަށް ތައުރީފުކޮށްފަ އެވެ. އަދި އެޓަލަންޓާ އަކީ މި ފަހަރުގެ އިޓާލިއަން ލީގުގައި އެންމެ ރަނގަޅަށް ކުޅެ، ލީގުގެ އެއް ވަނަ މަގާމުގައި އޮތް ޓީމު ކަމަށްވާއިރު، އެ ލެވަލްގެ ޓީމަކާ ދެކޮޅަށް އިންޓަ އިން މި ނެރުނު ނަތީޖާއިން ކުރިއަށްދާން ހިތްވަރެއް ލިބޭނެ ކަމަށް އިންޒާގީ ވަނީ ބުނެފަ އެވެ.