44 ސުކޫލަކުން ދަރިވަރުން ބައިވެރިވި 24 ވަނަ ގައުމީ ކެޑޭޓް ކޭމްޕު ނިންމާލައިފި

ރާއްޖޭގެ ކެޑޭޓުންނަށް އަމާޒުކޮށްގެން އެމްއެންޑީއެފުން ހިންގި 24 ވަނަ ގައުމީ ކެޑޭޓް ކޭމްޕު ނިންމާލައިފި އެވެ.

ގިރިފުށީ ޓްރެއިނިން ސެންޓަރުގައި އިއްޔެ މި ކޭމްޕު ނިންމަން ބޭއްވި މި ރަސްމިއްޔާތު ޝަރަފުވެރިކޮށްދެއްވީ ޗީފް އޮފް ޑިފެންސް ފޯސް، މޭޖާ ޖެނެރަލް އިބްރާހީމް ހިލްމީ އެވެ.

މިދިޔަ ޑިސެންބަރު 21 އިން މި އަހަރުގެ ޖެނުއަރީ އެއް ވަނަ ދުވަހުގެ ނިޔަލަށް ކުރިޔަށްގެންދިޔަ މި ކޭމްޕުގައި ރާއްޖޭގެ އެކި ކަންކޮޅު ތަކުން 44 ސުކޫލަކުން، 120 ދަރިވަރުން ބައިވެރިވި އެވެ.

މީގެ ތެރޭގައި ހިމެނެނީ، 66 ފިރިހެން ދަރިވަރުންނާއި 54 އަންހެން ދަރިވަރުންނެވެ.

އަދި އިންޓަނޭޝަނަލް ކެޑޭޓް އެކްސްޗޭންޖް ޕްރޮގްރާމުގެ ތެރެއިން އިންޑިއާ، ސްރީލަންކާ އަދި ނޭޕާލް ހިމެނޭހެން، 12 ކެޑޭޓުންނާއި އެ ގައުމު ތަކުގެ ޑެލިގޭޝަންގައި ހިމެނޭ ތިން އޮފިސަރުން ވަނީ މި ކޭމްޕަށް ޒިޔާރަތް ކޮށްފަ އެވެ.

މި ރަސްމިއްޔާތުގައި ވަނަވަނައަށް ހޮވުނު ކެޑޭޓުންނަށް ތަށްޓާއި ޝީލްޑް ހަވާލުކޮށްދެއްވީ، ޝަރަފުވެރި މެހެމާނު، ޗީފް އޮފް ޑިފެންސް ފޯސް، މޭޖާ ޖެނެރަލް އިބްރާހީމް ހިލްމީ އެވެ.

ކޭމްޕްގެ އެންމެ މޮޅު ފިރިހެން ދަރިވަރުގެ މަގާމު ހާސިލުކުރީ، އއ.މަތިވެރި ސުކޫލުގެ، ކެޑޭޓް ކޯޕްރަލް މުޙައްމަދު ޒިމްޔާން އެވެ. އެންމެ މޮޅު އަންހެން ދަރިވަރުގެ މަގާމު ހާސިލުކުރީ އަހުމަދިއްޔާ އިންޓަނޭޝަނަލް ސްކޫލުގެ، ކެޑޭޓް ކޯޕްރަލް ފާތިމަތު މައިހާ މުޙައްމަދެވެ.

އެކަޑެމިކް މާއްދާ ތަކުން އެންމެ މޮޅު ދަރިވަރުގެ މަގާމު ހާސިލުކުރީ މާފުށީ ސްކޫލުގެ، ކެޑޭޓް ސާޖަންޓް ޝައިމް ޝުވައިޒް އާދަމް އެވެ. އަދި އެންމެ މޮޅު ޕްލެޓޫންގެ މަގާމު ހާސިލު ކުރީ މައިކް ޕްލެޓޫން އެވެ.

އިންޓަނޭޝަނަލް ކެޑޭޓް އެކްސްޗޭންޖް ޕްރޮގްރާމުގެ ދަށުން މި ކޭމްޕުގައި ބައިވެރިވި ގައުމު ތަކުގެ ޑެލިގޭޝަންގެ އޮފިސަރުންނަށް މި ރަސްމިއްޔާތުގައި ވަނީ ބެޖު ހަވާލުކޮށްދެއްވާފަ އެވެ.

 އެ ފަރާތް ތަކަށް ބެޖު ހަވާލުކޮށްދެއްވީ، އެމްއެންޑީއެފް ކޮލެޖް އޮފް ޑިފެންސް އެންޑް ސެކިޔުރިޓީ ސްޓަޑީޒް އަދި ނޭޝަނަލް ކެޑޭޓް ކޯގެ ކޮމާންޑިން އޮފިސަރު، ބްރިގޭޑިއާ ޖެނެރަލް އަބްދުﷲ އިބްރާހީމް އެވެ.

އަދި، އެ ގައުމު ތަކުގެ ކެޑޭޓުންނަށް ބެޖު ހަވާލުކޮށްދެއްވީ، ނޭޝަނަލް ކެޑޭޓް ކޯގެ ޑިރެކްޓަރު، ނޭޝަނަލް ކެޑޭޓް ކޯގެ ކާނަލް މުޙައްމަދު އަޝްރަފް އެވެ.

މި ކޭމްޕުގައި ކިޔަވައިދީފައި ވަނީ އެމްއެންޑީއެފްގެ މުދައްރިބުންނެވެ. އަދި އެމްއެންޑީއެފްގެ މުދައްރިބުންނާއެކު، ގައުމީ ކެޑޭޓް ކޯގެ މުދައްރިބުންގެ ޓީމެއް މި ކޭމްޕްގައި ހަރަކާތްތެރިވެފައިވެ އެވެ.