އައު އަހަރުގެ ފުރަތަމަ ދުވަހު 311 ޓަނުގެ މަސް ކިރުވައިފި

މިއަހަރުގެ ފުރަތަމަ ދުވަހު 311 ޓަނުގެ މަސް ކިރުވާފައިވާކަމަށް ސަރުކާރުގެ މައި މަސްކުންފުނި މިފްކޯއިން ވިދާޅުވެއްޖެއެވެ.

މިފްކޯއިން ވިދާޅުވީ، މިދުވަސްވަރު މަސްވެރިކަން އެންމެ ރަނގަޅުވެފައިވަނީ ހުވަދު އަތޮޅުގައިކަމަށެވެ.

މިފްކޯއިން އާންމުކޮށްފައިވާ ތަފާސްހިސާބުތައް ދައްކާގޮތުން މިއަހަރުގެ ފުރަތަމަ ދުވަހު އެންމެ ގިނައިން މަސްކިރުވާފައިވަނީ ހުވަދު އަތޮޅަށެވެ. އެދުވަހު ހުވަދު އަތޮޅު ދެކުނުބުރީގެ 22 ދޯންޏަކުން 92.6 ޓަނުގެ މަސް މިފްކޯގެ ބޯޓުތަކަށް ކިރުވާފައިވެއެވެ. ދެން އެންމެ ގިނައިން ކިރުވާފައިވަނީ ހުވަދު އަތޮޅުގެ އުތުރުބުރީގައި ހަރަކާތްތެރިވަމުންދާ 20 ދޯންޏަކުން 80.7 ޓަނުގެ މަހެވެ.

ޅ. އަތޮޅުގައިވެސް މަސްވެރިކަން މިދުވަސްވަރު ރަނގަޅުކަމަށް މިފްކޯގެ ތަފާސްހިސާބުތަކުން ދައްކައެވެ. ފެލިވަރު ބަނދަރުގައި އޮތް 3 ބޯޓަކަށް 15 ދޯންޏަކުން 58.1 ޓަނުގެ މަސް ކިރުވާފައިވެއެވެ.

ޖެނުއަރީ މަހުގެ 1 ވަނަ ދުވަހު މިފްކޯގެ މަސް ބޯޓުތައް ފިޔަވައި އެންމެ ގިނައިން މަސްކިރުވާފައިވަނީ ކޫއްޑޫއަށެވެ. އެގޮތުން އެ ފެސިލިޓީއަށް 80.7 ޓަނުގެ މަސް ވަނީ ކިރުވާފައެވެ. ބޯޓުތަކަށް 221.1 ޓަނުގެ މަސް ވަނީ ކިރުވާފައެވެ. މިއާއެކު ޖުމްލަ 79 ދޯންޏަކުން 311 ޓަނު މަސް ވަނީ ކިރުވާފައެވެ.

މިފްކޯއިން މިހާރު ވަނީ ކޮންމެ ދުވަހަކުވެސް މަސްކިރުވި އަދަދާއި ކިރުވި ސަރަހައްދުތަކުގެ އެސަރަހައްދުތަކުގައި ހަރަކާތްތެރިވަމުންދާ ދޯނިތަކުގެ އަދަދު އެނގޭގޮތަށް، ތަފާސްހިސާބު އާންމުކުރަން ފަށާފައެވެ. މީގެ ސަބަބުން މަސްވެރިކަން ރަނގަޅު ހިސާބުތައް އެނގިގެންދާނެ ކަމަށް މިފްކޯއިން ވިދާޅުވެއެވެ.