މާދަމާ ވާނީ އެއާޕޯޓަށް ބާރު ބޮޑު ދުވަހަކަށް، ވަގުތު އޮއްވާ ދާން އެދިއްޖެ

މާދަމާ އަކީ އެއާޕޯޓަށް ބާރު ބޮޑު ދުވަހަކަށްވުމުން، ފުރާ ފަސިންޖަރުން، ވަގުތު އޮއްވާ އެއާޕޯޓަށް ދިއުމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން އެދެފި އެވެ.

އެމްއޭސީއެލުން ބުނީ އުމްރާ ވެރީން މާދަމާ ރާއްޖެ އަންނާތީ، އެއާޕޯޓުގެ މަގުތަކާއި ޓާމިނަލް އޭރިޔާއަށް ވަރަށް ބާރު ބޮޑުވާނެ ކަމަށް ބެލެވޭ ކަމަށެވެ.

އެހެންވެ، އެ ކުންފުނިން ވަނީ ފުރުމުގެ ތިން ގަޑިއިރު ކުރިން އެއާޕޯޓަށް ދިއުމަށް އެދެފަ އެވެ.

އެމްއޭސީއެލްއިން ބުނިގޮތުގައި މާދަމާ މެދުރު ކުރިން އެންމެ ބާރު ބޮޑުވާނެ ކަމަށް ބެލެވޭ ގަޑި ތަކަކީ ހެނދުނު 06:00 އާއި 9:00 އާ ދެމެދު އެވެ.

އެވަގުތު ތަކުގައި 2،678 މީހުން ރާއްޖެ އަންނާނެ ކަމަށް ލަފާކޮށްފައިވާއިރު، އޭގެ ތެރެއިން 618 މީހުންނަކީ އުމްރާގެ އަޅުކަމަށްފަހު އެނބުރި އަންނަ މީހުންނެވެ.

ވެލާނާ އިންޓަނޭޝަނަލް އެއާޕޯޓް (ވީއައިއޭ) ހިންގާ އެމްއޭސީއެލުން ބުނީ މާދަމާގެ ހަމަ އެވަގުތު 1,372 ޕެސެންޖަރުން ފުރާނެ ކަމަށް ބެލެވޭ ކަމަށެވެ.

މެންދުރު ފަހު އެންމެ ބާރު ބޮޑުވާނީ 2:00 އިން 6:00އާ ދެމެދު އެވެ.

އެ ވަގުތު 452 އުމްރާވެރީން ހިމެނޭގޮތަށް 2،071 މީހުން އަންނާނެ އެވެ. އަދި 1،091 މީހުން ފުރާނެ ކަމަށް ލަފާކުރެވެ އެވެ.

މި ދުވަސްކޮޅަކީ ސުކޫލް ޗުއްޓީއާއި އުމްރާވެރިން ރާއްޖެއަށް އެނބުރި އަންނަ ދުވަސްވަރު ކަމުން، އެއާޕޯޓަށް އިންތިހާއަށް ބާރުބޮޑެވެ.

އޭގެ އިތުރުން މިދުވަސްވަރަކީ ރާއްޖެއަށް ޕީކް ސީޒަން ކަމުން ގިނަ އަދަދަކަށް އިންޓަނޭޝަނަލް ފްލައިޓުތައް ވެސް މި ދުވަސްކޮޅު އާދެ އެވެ.