ކޮރަޕްޝަން ތަހުގީގު ކުރުމުގައި ރައީސް ބައްލަވަނީ މީހާއަކަށް ނޫން، ކުރި ކަމަކަށް: އަދުރޭ

ދައުލަތުގެ ތެރޭގައި ހިންގާ ކޮރަޕްޝަންގެ މައްސަލަތައް ތަޙުޤީޤުކުރުމުގައި ރައީސް ޑރ. މުޙައްމަދު މުޢިއްޒު ބައްލަވަނީ މީހާއަށް ނޫން ކަމަށާއި، އެ މީހަކު ކުރި ކަމަކަށް ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.

ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަދައްކަވަމުން، އަބްދުއްރަހީމް ވިދާޅުވީ ކޮރަޕްޝަންގެ މައްސަލަތަކުގައި ފިޔަވަޅު އަޅާއިރު، އެއީ ކުރީ ސަރުކާރުގެ އިސްބޭފުޅެއްތޯ ނުވަތަ އެއީ އެ ވަގުތަކު ވެރިކަމުގައި ހުންނެވި ބޭފުޅެއްގެ އަރިސް މީހެއްތޯ ބަލާކަށް ނުޖެހޭ ކަމަށެވެ.

މަޖިލީހުގެ ރައީސް ވިދާޅުވީ، ރައީސް މުޢިއްޒުގެ އަމާޒަކީ ކަން ކުރީ ކާކުތޯ ބެލުމެއް ނޫން ކަމަށާއި، އެ ކުރީ ކޮން ކަމެއްތޯ، އެކަން ކުރީ ހަމައިންތޯ ނަހަމައިންތޯ، ޤާނޫނާ އެއްގޮތަށްތޯ ޤާނޫނާ ޚިލާފަށްތޯ، މާލިއްޔަތު ޤާނޫނުން އެކަން ކުރަން ތަންދޭތޯ، އޭގައި ދައުލަތަށް ގެއްލުން ވަނީ ކިހާވަރެއްތޯ، އެ ގެއްލުންވީ ކާކުގެ ސަބަބުންތޯ ބެއްލެވުން ކަމަށެވެ.

އަބްދުއްރަހީމް ވިދާޅުވީ، ކޮރަޕްޝަން ހިންގީ ނުވަތަ ޤާނޫނާއި އުސޫލުގެ ބޭރުން ކަންކަން ކުރީ ކާކުކަން އެނގުނަސް ކުށްވެރިވާ މީހަކު ކަނޑައަޅާނީ އިޖުރާއަތުތަކުގެ ތެރެއިން ކަމަށެވެ. އޭނާ ވިދާޅުވި ގޮތުގައި އެ މީހަކަށް ދަޢުވާ ކުރުމާއި ނުކުރުމުގެ ޒިންމާ އޮތީ ޕްރޮސެކިއުޓަރ ޖެނެރަލްގެ އަތްމަތީގައެވެ.

މީގެއިތުރުން، އަބްދުއްރަހީމް ވިދާޅުވީ މީހަކު ކުރި ކުށަކާ ގުޅިގެން އެ މައްސަލަ ތަޙުޤީޤީ އިދާރާތަކުން ބަލަން ފެށުމުން މި ސަރުކާރުން ނުކުމެ އެކަމެއް ނުހުއްޓުވާނެ ކަމަށެވެ. އެޗްޑީސީގެ ތެރެއިން ދާދި ފަހުން ފެންމަތިވި ކޮރަޕްޝަންގެ ތުހުމަތު ކުރެވޭ މައްސަލަތަކަށް އިޝާރާތްކުރައްވަމުން، އެ މައްސަލަތައްވެސް ބެލެމުންދާ ކަމަށް އޭނާ ފާހަގަކުރެއްވިއެވެ.