އެމްޑަބްލިއުއެސްސީން މާލެ ސަރަހައްދުގައި ފެން އުފެއްދުމުގެ ގާބިލުކަން ދެގުނަ ކުރަނީ

މާލެ ސަރަޙައްދުގައި ފެން އުފައްދާ ކެޕޭސިޓީ ދެ ގުނަ އިތުރުކުރުމަކީ އަމާޒެއްކަމަށް އެމްޑަބްލިއުއެސްސީގެ މެނޭޖިން ޑިރެކްޓަރ ޢަބްދުލްމަތީން މުޙައްމަދު ވިދާޅުވެއްޖެއެވެ.

މިހާރު މާލެ ސަރަޙައްދުގައި ފެނުގެ ޚިދުމަތް ދިނުމަށް ޤާއިމުކޮށްފައިވާ ޕްލާންޓްތަކަކީ ދުވާލަކު 20,000 ޓަނުގެ ފެން އުފެއްދުމުގެ ޤާބިލުކަން ލިބިފައިވާ ނިޒާމެކެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން، އެމްޑަބްލިއުއެސްސީގެ މެނޭޖިން ޑިރެކްޓަރ ވިދާޅުވީ އިތުރުވަމުން އަންނަ އާބާދީއާއެކު މާލެ ސަރަޙައްދުގައި ފެން އުފައްދާ ކެޕޭސިޓީ އިތުރުކުރަންޖެހިފައިވާ ކަމަށެވެ. މިގޮތުން މާލެ އަދި ހުޅުމާލެ ހިމެނޭހެން، 5,000 ޓަނުގެ ފެން އުފައްދާ އިތުރު ދެ ޕްލާންޓްގެ މަސައްކަތް ފެށުމަށް ތައްޔާރުވެފައިވާ ކަމަށް އޭނާ ވިދާޅުވިއެވެ.

މި އައު ޕްލާންޓްތަކާއެކު، މިހާރު މާލޭގައި ފެން އުފައްދާ ކެޕޭސިޓީއަށް އިތުރު 30 އިންސައްތަ އިތުރުކުރެވޭނެ ކަމަށް މަތީން ވިދާޅުވިއެވެ. މި މަޝްރޫޢުގެ މަސައްކަތް 2025 ވަނަ އަހަރު ފުރިހަމަކުރުމަކީ އެ ކުންފުނީގެ އަމާޒެއްކަމަށްވެސް އޭނާ ފާހަގަކުރެއްވިއެވެ.

ފެން ރައްކާކުރެވޭ ކެޕޭސިޓީ އިތުރުކޮށް މި ސަރަޙައްދަށް ފެނުގެ ރައްކާތެރިކަން އިތުރުކުރުމަކީވެސް ކުންފުނީގެ އަމާޒެއްކަމަށް މަތީން ވިދާޅުވިއެވެ. މިގޮތުން މިވަގުތު އެންމެ އިސްކަމެއްދީގެން ކުރަމުންދަނީ މާލެއާއި ހުޅުމާލޭގެ ފެނުގެ ވިއުގަ ގުޅާލުމުގެ މަސައްކަތެވެ. މި މަސައްކަތް މި އަހަރުގެ ކުރީކޮޅު ނިންމާނެކަމަށް އެމްޑަބްލިއުއެސްސީގެ މެނޭޖިން ޑިރެކްޓަރ ވިދާޅުވިއެވެ.

މާލެ ސަރަޙައްދުގައި މިހާރު ދުވާލަކަށް 11,000 ޓަނަށްވުރެ ގިނަ އަދަދަކަށް ފެން ބޭނުންވާކަން ފާހަގަކޮށްލެވެއެވެ. އެހެންކަމުން، އާބާދީ އިތުރުވަމުންދާ މިންވަރަށް ބަލާއިރު، ފެނުގެ ޚިދުމަތް ފުޅާކުރުމަކީ މުހިންމު ކަމެއްކަން އެނގެއެވެ.