އަދީބު ނުދައްކާ އޮތް އެއް މިލިއަން ރުފިޔާގެ ޖޫރިމަނާ މަހެއް ތެރޭ ދައްކަން ހުކުމެއް

ކުރީގެ ނައިބު ރައީސް އަހުމަދު އަދީބު --

ކުރީގެ ނައިބު ރައީސް އަހުމަދު އަދީބުގެ މައްޗަށް އިއްވާފައިވާ ދެ މިލިއަން ރުފިޔާގެ ޖޫރިމަނާ ފައިސާގެ ތެރެއިން މިހާތަނަށް ނުދައްކަވައި އޮތް އެއް މިލިއަން ރުފިޔާ މަސް ދުވަހުގެ ތެރޭގައި ދެއްކުމަށް ސިވިލް ކޯޓުން ހުކުމް ކޮށްފި އެވެ.

އަދީބުގެ މައްޗަށް ދެ މިލިއަން ރުފިޔާގެ ޖޫރިމަނާއެއް އިއްވީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ބޮޑު ހިޔާނައި ގުޅުވައިގެންނެވެ.

މި މައްސަލައިގައި އަދީބުގެ މައްޗަށް 20 އަހަރުގެ ޖަލު ހުކުމެއް އިއްވައި ދެ މިލިއަން ރުފިޔާއިން ޖޫރިމަނާ ކުރީ 2020 ވަނަ އަހަރުގެ އޮކްޓޫބަރު ފަސް ވަނަ ދުވަހު އެވެ.

އެ ހުކުމުގައި ވަނީ އެއްމަސް ދުވަހުގެ ތެރޭގައި ޖޫރިމަނާ ދެއްކުމަށެވެ. ނަމަވެސް އެ ފައިސާގެ ތެރެއިން އަދީބު އެއް މިލިއަން ރުފިޔާ ދައްކާފައެއް ނުވެ އެވެ.

މި މައްސަލަ އެޓާނީ ޖެނެރަލް އޮފީހުގެ ފަރާތުން ސިވިލް ކޯޓަށް ހުށަހެޅުމުން އެ ކޯޓުން އިއްޔެ ހުކުމް ކުރީ އަދީބު ނުދައްކާ އޮތް އެއް މިލިއަން ރުފިޔާ، އެ ދުވަހުން ފަށައިގެން އެއް މަސް ތެރޭގައި މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް ދައްކައި ހަލާސް ކުރުމަށެވެ.

އަދީބުގެ މައްޗަށް އިއްވި 20 އަހަރުގެ ޖަލު ހުކުމަށް ލުއި ދީ އެ މަނިކުފާނު މިނިވަން ކުރެއްވީ ދައުރު ނިމެން މަދު ދުވަސްކޮޅަކަށް ވެފައި ވަނިކޮށް ކުރީގެ ރައީސް އިބްރާހިމް މުޙައްމަދު ސޯލިހެެވެ.

ސިވިލް ކޯޓް