މައިކަޕް ޝަރަފްވެރިކުރަން މިނިސްޓަރ ރާފިޢު އިހަވަންދުއަށް، މެޗުގެ ކުރިން ހަވާ އަރުވާނެ

ބިއުޓިފުލް ބުލޫ މައިކަޕް ފުޓުބޯޅަ މުބާރާތުގެ ފައިނަލް މެޗް ޝަރަފުވެރިކޮށްދެއްވުމަށް ސްޕޯޓްސް މިނިސްޓަރ ރާފިޢު އިހަވަންދުއަށް މިރޭ ވަޑައިގަންނަވާ ގޮތަށް ހަމަޖެހިޖެއެވެ.

މި މުބާރާތް އިންތިޒާމު ކުރާ ކްލަބް ޕޯލްސްޓާރ އިން މައުލޫމާތު ދެއްވާ ގޮތުގައި މިނިސްޓަރ ރާފިއު އިހަވަންދުއަށް ވަޑައިގަތުމަށް ހަމަޖެހިފައިވަނީ މިރޭ 20:00 ގައެވެ.

ކްލަބް ޕޯލްސްޓަރގެ ރިހިޔޫބީލް ފާހަގަ ކުރުމުގެ ގޮތުންނާއި އަދި ބޮޑުތިލަދުންމަތީގައި ބާއްވަމުން އަންނަ އެންމެ އަގުބޮޑު ފުޓުބޯޅަ މުބާރާތް މައިކަޕް ނިންމުމުގެ ގޮތުން މިރޭގެ ފައިނަލް މެޗް ފެށުމުގެ ކުރިން ހަވާ އެރުވުމަށްވެސް ވަނީ ހަމަޖެހިފައެވެ.

މުބާރާތުގެ ފައިނަލްގައި ވާދަކުރާނީ އެންވީކޭ އަދި ކުޅިމަގެވެ.

މިއީ މިމުބާރާތުގެ ފައިނަލްގައި އެންވީކޭ ކުޅޭ 5 ވަނަ ފަހަރެވެ. އެއީ ނަމަވެސް އެޓީމަށް މިމުބާރާތް ކާމިޔާބުކުރެވިފައިވަނީ އަދި 1 ފަހަރުއެވެ. ސަޕޯޓަރުންގެ ސްކޯ ޕްރެޑިކްޝަން އަށް ބަލާއިރު މި މުބާރާތް ކާމިޔާބު ކުރުން އެންމެ ގާތީ ކުޅިމަގެވެ.

ބިއުޓިފުލް ބްލޫ މައިކަޕް 2024، ފުޓްބޯޅަ މުބާރާތުގައި 6 ރަށަކުން 9 ޓީމް ވަނީ ބައިވެރިވެފައެވެ.  މައިކަޕްގެ ބާނީއަކީ އިހަވަންދޫ ދާއިރާގެ ކުރީގެ މެމްބަރު މުހައްމަދު އަބުދުﷲ (މުހައްމާ) އެވެ.

2007 ވަނަ އަހަރުންފެށިގެން މިހާތަނަށް މައިކަޕްގެ 13 މުބާރާތެއް ބާއްވާފައިވާއިރު، މިއީ މިސަރަހައްދުގައި ބާއްވާ އެންމެ ވަރުގަދަ އެއް މުބާރާތެވެ.  މިއަހަރު ބާއްވާ މައިކަޕް ފުޓްބޯޅަ މުބާރާތުގެ ޓައިޓަލް ސްޕޮންސަރ ކޮށްފައިވަނީ ބިއުޓިފުލް ބްލޫއެވެ. މިއަހަރުގެ މައިކަޕްގެ ޗެމްޕިއަން ޓީމަށް 100،000 ރުފިޔާ އަދި ރަނަރަޕް ޓީމަށް 35،000 ރުފިޔާގެ ފައިސާގެ އިނާމެއް ދިނުމަށް ވަނީ ނިންމައިފައެވެ.