މޫސުން ވަރަށް ގޯސް، ކަނޑުދަތުރު ކުރުމުގައި ސަމާލުވާން ފުލުހުން އިލްތިމާސް ކޮށްފި

ކުރިއަށް އޮތީ މޫސުން ގޯސް ދުވަސް ތަކަށްވުމުން ދަތުރުފަތުރު ކުރުމުގައި ސަލާމަތީ ރައްކާތެރިކަން ކަށަވަރު ކުރުމަށް ފުލުހުން އިލްތިމާސް ކޮށްފި އެވެ.

މޫސުން ގޯސްވާނެ ކަމަށް ލަފާކޮށް މޫސުމާބެހޭ ގައުމީ އިދާރާ (މެޓް) އިން އަންނަނީ ރާއްޖޭގެ އެކި ސަރަހައްދު ތަކަށް އިއްޔެއިން ފަށައިގެން އެލާޓްތައް ނެރެމުންނެވެ.

އެގޮތުން އެންމެ ފަހުން ޔެލޯޓް އެލާޓް ނެރެފައި ވަނީ ލ. އަތޮޅަށެވެ. އެއީ މިއަދުގެ އިރު އޮއްސި 6:30އާ ހަމައަށެވެ.

މެޓުން ބުނީ އެ ގަޑިތަކުގައި އެ އަތޮޅަށް ބޯކޮށް ވާރޭ ވެހި ގުގުރުމާއެކު ވިލާގަނޑުގައި ގަޑިއަކު 45 މޭލަށް ވައި ގަދަވާނެ ކަމަށް ލަފާ ކުރެވޭ ކަމަށެވެ.

ކުރިއަށް އޮތް ހަތަރު ދުވަހު ވެސް މޫސުން ގޯސްވާނެ މެޓުން ލަފާކޮށްފައިވެ އެވެ.

އެ އިދާރާއިން ބުނެފައި ވަނީ ސްރީލަންކާގެ އިރު ދެކުނުގަ އުފެދިފައިވާ ކޮޅިގަނޑާއި، އެ ކޮޅިގަނޑާ ގުޅިފައިވާ ލޯ ޕްރެޝާ ޓްރަފުގެ ސަބަބުން އައު އަހަރުގެ ބަންދު ތެރޭގައި ރާއްޖެއަށް ވަރަށް ބޮޑަށް ވިއްސާރަ ކުރާނެ ކަމަށެވެ.

ފުލުހުން މިއަދު ނެރުނު ސަމާލުގައި ވަނީ އުޅަނދުގައި ސަލާމަތީ ގޮތުން ފުރިހަމަ ކުރާން ޖެހޭ ކަންކަން ފުރިހަމަ ވެފައިވޭތޯ ޔަގީން ކުރުމަށާއި އުޅަނދަށް އެކަށީގެންނުވާ ވަރަށް މީހުން ނޭރުވުމަށާއި އަދި އުޅަދަށް ކަނޑައެޅިފައިވާ މިންގަނޑަށްވުރެ އިތުރަށް މުދާ ބަރު ނުކުރުމަށް އިސްތިމާސް ކޮށްފަ އެވެ.

އޭގެ އިތުރުން ވައިގަދަ ވަގުތު ތަކުގައި ކޮންޓްރޯލް ކުރެވޭ މިންގަނޑެއްގައި އުޅަނދުގެ ސްޕީޑް ބެހެއްޓުމަށާއި ވިއްސާރައިގައި ދުއްވާއިރު އުޅަނދުގެ ހެޑްލައިޓް ދިއްލުމަށް ފުލުހުން އިލްތިމާސް ކުރެ އެވެ. އަދި ވަޔާއެކު ހަލާކު ނުވާނެ ފަދަ ވިއްސާރަ ކޯޓު ބޭނުން ކުރުމަށާއި ވަޔާއެކު ބުރުގާ މޫނު މައްޗަށް ނުދާނެހެން ބެހެއްޓުމާ އެކު މަގުމަތީ އުޅަނދު ދުއްވާއިރު ހިނގާ މީހުންނަށް ހާއްސަ ސަމާލުކަމެއް ދިނުމަށް ވެސް ފުލުހުން އިލްތިމާސް ކޮށްފައިވެ އެވެ.