މެޓް އޮފީހުން ބ. އަތޮޅުން ތ. އަތޮޅަށް ވައި ގަދަވާނެކަމަށް ލަފާކޮށް ޔެލޯ އެލާޓް ނެރެފި

ކުރިއަށް އޮތް ހަތަރު ދުވަހު ވެސް ރާއްޖޭގެ މޫސުން ގޯސްވާނެ

ވިލާގަނޑުގައި ގަޑިއަކު 45 މޭލަށް ވައި ގަދަވާނެ ކަމަށް ލަފާކޮށް މޫސުމާބެހޭ އިދާރާ (މެޓް) އިން ބ. އަތޮޅުން ފެށިގެން ތ. އަތޮޅަށް ޔެލޯ އެލާޓެއް ނެރެފިއެވެ.

މެޓް އޮފީހުން ބުނިގޮތުގައި މި އެލާޓް ދެމިއޮންނާނީ މެންދުރު 2:00 އިން ފެށިގެން އިރުއޮއްސޭ 6:30 ގެ ނިޔަލަށެވެ.

މެޓް އޮފީހުން ބުނެފައިވަނީ ރާއްޖެއަށް ކުރަމުންދާ ވިއްސާރައިގައި ބ. އަތޮޅުން ފެށިގެން ލ. އަތޮޅަށް ބޯކޮށް ވާރޭވެހި ގުގުރުމުގެ އިތުރުން ކަނޑުތައް ގަދަވާނެ ކަމަށް ލަފާކުރެވޭ ކަމަށެވެ. މި މޫސުން ގޯސްވަނީ ސްރީލަންކާގެ އިރުދެކުނުގައި އުފެދިފައިވާ ކޮޅިގަނޑާއި، އެ ކޮޅިގަނޑާ ގުޅިފައިވާ ލޯ ޕްރެޝާ ޓްރަފުގެ ސަބަބުންނެވެ.

އާ އަހަރުގެ ފުރަތަމަ ފަސް ދުވަހު ރާއްޖެއަށް ކުރަމުންދާ ވިއްސާރައިގެ ބާރު ގަދަވާނެ ކަމަށް މެޓް އޮފީހުން އިއްޔެ ވަނީ ބުނެފައެވެ. ޖެނުއަރީ 5 އާ ހަމައަށް ރާއްޖޭގެ ބޮޑު ބަޔަކަށް ގުގުރުމާއެކު ބޯކޮށް ވާރޭވެހި، ވައިގަދަވުމުގެ ސަބަބުން ކަނޑުތައް ގަދަވާނެ ކަމަށް ލަފާކޮށްފައިވެއެވެ. އަދި ބައެއް ރަށްތަކަށް އުދަ އަރާނެ ކަމަށްވެސް މެޓުން ވަނީ ލަފާކޮށްފައެވެ.

މެޓް އޮފީހުން ވަނީ ހުރިހާ އެންމެން، ޚާއްޞަކޮށް ކަނޑު ދަތުރުކުރާ މީހުން މޫސުމާ ގުޅޭގޮތުން ނެރޭ މަޢުލޫމާތުތަކަށް ސަމާލުވުމަށް އެދިފައެވެ. މި ދުވަސްވަރު ދަތުރުފަތުރު ކުރާއިރު އިތުރަށް ސަމާލުވުމަށާއި، ރައްކާތެރިކަމުގެ ފިޔަވަޅުތައް އެޅުމަށް އާންމުންނަށް އިލްތިމާސްކޮށްފައިވެއެވެ.

މޫސުން