ރައީސްގެ ދެ ކަނބަލުން އައު އަހަރުގެ ތަހުނިޔާ ބޭރު ގައުމުތަކުގެ ވެރިންނަށް ފޮނުއްވައިފި

ރައީސް ޑރ. މުޙައްމަދު މުއިއްޒާއި އަނބިކަނބަލުން ސާޖިދާ މުޙައްމަދު -- ފޮޓޯ/ ރައީސް އޮފީސް

ރައީސުލްޖުމްހޫރިއްޔާ ޑރ. މުޙައްމަދު މުއިއްޒާއި އެ މަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދު، މީލާދީ އައު އަހަރުގެ ތަހުނިޔާ، އެކުވެރި ގައުމުތަކުގެ އިސް ވެރިންނަށާއި، ސަރުކާރު ތަކަށް ފޮނުއްވައިފި އެވެ.

ރައީސްގެ ދެކަނބަލުންގެ ތަހުނިޔާ މެސެޖުގައި މިފެށޭ އައު އަހަރަކީ ތަނަވަސް ކަމާއި އުފާ ފާގަތި ކާމިޔާބު އަހަރަކަށް ވާނޭ ކަމުގެ އުންމީދު ކުރައްވާ ކަމުގައި ފާހަގަ ކުރައްވާފައިވެ އެވެ.

އޭގެ އިތުރުން ބައިނަލްއަގުވާމީ ޖަމިއިއްޔާ ޖަމާއަތް ތަކުގެ ވެރިންނަށާއި ރެސިޑެންޓް ޑިޕްލޮމެޓިކް މިޝަން ތަކުގެ ވެރިންނަށް ރައީސް ތަހުނިޔާ ވިދާޅުވެފައިވެ އެވެ.

ރައީސް ރޭ ވަނީ އައު އަހަރުގެ ހެޔޮއެދުމާ ތަހުނިޔާ ދިވެހި އެންމެހާ ރައްޔިތުންނަށް ވެސް އަރިސް ކުރައްވާފަ އެވެ.

އައު އަހަރު ފެށުމުގެ މުނާސަބަތުގައި ރައީސް ފޮނުއްވި ހިތޯބުގައި ވިދާޅުވީ މި ފެށޭ އައު އަހަރު ހިމެނިގެން ދާނީ ރާއްޖޭގެ އެކި ކަންކޮޅު ތަކުގައި ތަރައްގީގެ އެކި މަޝްރޫއުތައް ފަށައި، އިގުތިސާދީ ފުދުންތެރިކަން އިއާދަވެ، އާންމު ތިޔާގި ކަމެއް މުޅި ގައުމަށް ލިބެން ފަށާނެ އަހަރަކަށް ކަމަށެވެ.

މީލާދީ އައު އަހަރާ ގުޅިގެން ރައީސް ފޮނުއްވި ހިތޯބު ނިންމަވާލައްވާފައިވަނީ އެންމެން ގުޅިގެން ގައުމީ ތަރައްގީގައި އެއް އަމާޒަކަށް ދަތުރު ކުރުމަށް ބާރު އަޅުއްވަމުންނެވެ. އަދި 2025 ވަނަ އަހަރަކީ ދިވެހީންގެ ރާއްޖޭގެ އަންނަން އޮތް މުސްތަގުބަލަށް ޓަކައި ޒިންމާދާރުކަމާ އެކީ، ގައުމު ބިނާ ކުރުމުގެ އަހަރު ކަމުގައި އެ މަނިކުފާނު ފާހަގަ ކުރައްވާފައިވެ އެވެ.

ރައީސް ޑރ މުޙައްމަދު މުޢިއްޒު