ރަޝިޔާ-ޔޫކްރެއިން ހަނގުރާމައިގެ 300 އަށްވުރެ ގިނަ އަސީރުން ބަދަލުކޮށްފި

ރަޝިޔާއާއި ޔޫކްރެއިނުގެ މެދުގައި 300 އަށްވުރެ ގިނަ އަސީރުން ބަދަލުކޮށްފިއެވެ.

މި ބަދަލުކުރުމުގައި ޔޫކްރެއިނުގެ 189 އަސީރުންނާއި ރަޝިޔާގެ 150 އަސްކަރީ ޚިދުމަތްތެރިން ހިމެނެއެވެ. މިއީ 2022 ވަނަ އަހަރު ރަޝިޔާ-ޔޫކްރެއިން ހަނގުރާމަ ފެށުނު ފަހުން އަސީރުން ބަދަލުކުރި 59 ވަނަ ފަހަރެވެ.

ޔޫކްރެއިނުގެ ރައީސް ވޮލޮޑީމީރް ޒެލެންސްކީ ވިދާޅުވެފައިވަނީ މިއީ އުފާވެރި ޚަބަރެއް ކަމަށާއި، ދޫކޮށްލެވުނު ޔޫކްރޭނުގެ މީހުންގެ ތެރޭގައި ކުރީ ސަފުގައި ޙަރަކާތްތެރިވާ ސިފައިންނާއި ސާޖަންޓުންނާއި އޮފިސަރުން ހިމެނޭ ކަމަށެވެ. އަދި ރަޝިޔާއިން 2022 ވަނަ އަހަރު މަރިއުޕޮލުން ގެންގޮސްފައިވާ ޢާންމުންގެ ދެ މީހުން ވެސް ހިމެނޭ ކަމަށް ވިދާޅުވިއެވެ.

އަސީރުން ބަދަލުކުރުމުގައި އެކުވެރި ޢަރަބި އިމާރާތް (ޔޫއޭއީ) ގެ ދައުރު ފާހަގަކޮށް، ޒެލެންސްކީ ވަނީ އެ ޤައުމަށާއި މި މަސައްކަތުގައި އެހީތެރިވި އެހެން ފަރާތްތަކަށް ޝުކުރު އަދާކުރައްވާފައެވެ. ޔޫއޭއީން ވެސް ވަނީ މި މަސައްކަތުގައި އެހީތެރިވެދިން ކަން ޔަޤީންކޮށްދީފައެވެ.

ޔޫކްރެއިނުގެ އިދާރާތަކުން ބުނެފައިވަނީ މިހާތަނަށް ޖުމްލަ 3,956 ޔޫކްރޭނު އަސީރުން ޤައުމަށް އެނބުރި ގެނެސްފައިވާ ކަމަށެވެ. މި އަހަރު ދޫކޮށްލި މީހުންގެ ތެރޭގައި ރަޝިޔާގެ ކޯޓުތަކުން އެކި ކުށްތަކުގައި ޙުކުމް އިއްވާފައިވާ ޔޫކްރެއިނުގެ ރައްޔިތުންވެސް ހިމެނެއެވެ.

ދޫކޮށްލެވުނު ރަޝިޔާގެ އަސީރެއް ބުނެފައިވަނީ އަނބުރާ ޤައުމަށް އައުމާއި، ސަރުކާރުން އެމީހުންގެ އަގު ވަޒަންކުރާކަން އެނގުމުން ވަރަށް އުފާވެފައިވާ ކަމަށެވެ. އަދި މިކަން ޙަޤީޤަތުގައިވެސް ވެއްޖެކަން އަދިވެސް މުޅިން ޤަބޫލުނުކުރެވޭ ކަމަށް އޭނާ ބުނެފައިވެއެވެ.