ލިވަޕޫލުން އާނޯލްޑް ވިއްކާނުލާނެކަމަށް ބުނެ ރެއާލް މެޑްރިޑަށް ޖަވާބުދީފި

ޓްރެންޓް އަލެކްސަންޑަ-އާނޯލްޑް

ލިވަޕޫލްގެ ސްޓާ ފުލްބެކް ޓްރެންޓް އަލެކްސަންޑަ-އާނޯލްޑް ޖެނުއަރީ ޓްރާންސްފާ މާކެޓްގައި ވިއްކާލަން ނެތްކަމަށް އެ ކްލަބުން ސްޕެއިނުގެ ގަދަބާރު ރެއާލް މެޑްރިޑަށް އަންގައިފިއެވެ.

އާނޯލްޑްގެ ކޮންޓްރެކްޓް މި ސީޒަނުގެ ނިޔަލަށް އޮތްއިރު، އޭނާއަށް އެއްބަސްވުން އާކުރުމަށް ލިވަޕޫލުން ހުށަހެޅި ހުރިހާ ޕްރޮޕޯސަލްތަކަށް މިހާތަނަށް ފުރަގަސްދީފައިވެއެވެ.

ޖެނުއަރީ 1 އިން ފެށިގެން އާނޯލްޑަށް އިނގިރޭސި ނޫން ކްލަބްތަކާއެކު ޓްރާންސްފާގެ މަޝްވަރާތައް ކުރެވޭނެއެވެ. އެހެންނަމަވެސް، ރެއާލް މެޑްރިޑުން ޖެނުއަރީގައި އާނޯލްޑް ގަތުމަށް ބިޑްކުރަން ތައްޔާރުވަމުންދާ ކަމަށް ސްޕެއިނުގެ މީޑިއާތަކުން ރިޕޯޓުކޮށްފައިވެއެވެ.

ލިވަޕޫލުން އަދިވެސް މަސައްކަތްކުރަނީ އާނޯލްޑްގެ އެއްބަސްވުން އާކުރެވޭތޯއެވެ. ސީޒަން ނިމުމުން ހިލޭ ޓްރާންސްފާއެއްގައި އޭނާ ގެއްލުމުގެ ބިރު އޮތްނަމަވެސް، އެ ރިސްކު ނަގައިގެން އާނޯލްޑް ލައްވައި އާ ކޮންޓްރެކްޓެއް ހެދޭތޯ ލިވަޕޫލުން މަސައްކަތްކުރަމުންދެއެވެ.

އާނޯލްޑަކީ ލިވަޕޫލްގެ އެކެޑަމީން ފުރަތަމަ ޓީމާ ހަމައަށް އައިސް އެންމެ ބޮޑު ތަފާތެއް ދެއްކި ކުޅުންތެރިއެވެ. މިހާތަނަށް ލިވަޕޫލަށް ކުޅެދިން 333 މެޗުން އާނޯލްޑް ވަނީ 20 ގޯލު ޖަހައިދީ 85 ލަނޑު ޖަހަން ފުރުސަތު ތަނަވަސްކޮށްދީފައެވެ.

ލިވަޕޫލް