އެފްޓީއޭއަށް އަމަލު ކުރަން ފެށުމުން ޗައިނާއަށް އެކްސްޕޯޓް ކުރާ މަހުގެ ޓިއުޓީ ކަނޑާލާނެ!

ޗައިނާއާއެކު ހަދާފައި އޮތް ފްރީ ޓްރޭޑް އެގްރިމެންޓަށް އަމަލު ކުރަން ފެށުމުން ރާއްޖެއިން އެކްސްޕޯޓް ކުރާ މަހުގެ ބާވަތްތަކާއި މަހުގެ އުފެއްދުން ތަކުން ޑިއުޓީ މައާފު ވާނެ ކަމަށް އިކޮނޮމިކް މިނިސްޓްރީން ބުނެފި އެވެ.

އެ މިނިސްޓްރީން މައުލޫމާތު ދިން ގޮތުގައި މިނިވަން ވިޔަފާރީގެ އެއްބަސްވުމަށް އަމަލު ކުރަން ފެށުމުން ރާއްޖެއިން ޗައިނާއަށް ބޭރުކުރާ މަހުގެ ބާވަތްތައް ސުން ޓެކުހުގައި ޗައިނާއަށް އެތެރެ ކުރެވޭނެ އެވެ.

ޗައިނާއަށް އެތެރެ ކުރެވޭނެ މަހުގެ ތެރޭގައި ފިނި ކުރި ނުވަތަ ގަނޑު ކުރި ކަޅުބިލަ މަހާއި ފާނައިގެ ބާވަތް ތަކާއި ކަންނެލީގެ ބާވަތްތައް ހިމެނެއެވެ.

ޕްރޮސެސްކޮށްފައި ހުންނަ މަހުގެ އުފެއްދުން ތަކުގެ ތެރޭގައި ދަޅުމަހާއި ވަޅޯމަހާއި ލޮނުމަހާއި ސީފުޑްގެ ބާވަތްތައް ވެސް ހިމެނެ އެވެ.

މި ސަރުކާރުން ދަނީ ރާއްޖޭގެ މަސްވެރިކަމުގެ ސިނާއަތް ސިންދަފާތުކޮށް އިގުތިސާދީ ނަފާ އިތުރުކުރުމަށް ގިނަގުނަ މަސައްކަތްތަކެއް ކުރަމުންނެވެ.

މީގެ ތެރޭގައި އަގުއެއްކުރި މަހުގެ ބާވަތްތައް އުފެއްދުމަށް ބޭނުންވާ ޕްރޮސެސިން ފެސިލިޓީތައް ގާއިމު ކުރުމާއި މަސްވެރީން ބާނާ މަސް ގިނަ ދުވަހު ރައްކާކޮށްފައި ބެހެއްޓުމަށް ބޭނުންވާ ކޯލްޑް ސްޓޯރޭޖް ކެޕޭސިޓީ އިތުރުކުރުން ފަދަ ކަންކަން ހިމެނެ އެވެ.

 ޗައިނާ-ދިވެހިރާއްޖެ މިނިވަން ވިޔަފާރީގެ އެއްބަސްވުމުގެ ސަބަބުން މަސްވެރިކަން ސިންދަފާތުކުރުމަށާއި މަހާއި މަހުގެ އުފެއްދުން ތަކަށް ނަފާވެރި އަގެއް ލިބުމުގެ މަގުތައް ހުޅުވިގެން ދާނެ އެވެ.

މިނިވަން ވިޔަފާރީގެ އެއްބަސްވުމަށް އަމަލުކުރަން ފަށާނީ އަންނަ އަހަރުގެ ޖެނުއަރީ މަހުގެ ފުރަތަމަ ދުވަހުން ފެށިގެނެވެ.