އިސްލާމިކް މިނިސްޓްރީން އަންނަ އަހަރު ގިނަ މަޝްރޫއު ތަކެއް ފަށަނީ

އިސްލާމީ ކަންތައްތަކާބެހޭ ވުޒާރާއިން 2025 ވަނަ އަހަރު އައު ގިނަ މަޝްރޫޢުތަކެއް ފަށާނެ ކަމަށް އެ ވުޒާރާގެ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ 2025 ވަނަ އަހަރުގެ އެކްޝަން ޕްލޭނާއި، ރިސާލަތު ޕްރޮގްރާމް 2025 އަދި ނަމާދު މަތިވެރިކުރުމުގެ ޕްރޮގްރާމް އިފްތިތާޙްކުރުމުގެ ރަސްމިއްޔާތުގައެވެ.

ވަޒީރު ވިދާޅުވި ގޮތުގައި، އަންނަ އަހަރު ވަޤުފް އިމާރާތްތައް އާރާސްތުކުރުމާއި ރާއްޖޭގައި ޒަކާތު ހައުސްގެ އިމާރާތެއް އެޅުމުގެ މަސައްކަތް ފެށުން ހިމެނެއެވެ. މީގެ އިތުރުން "ނަމާދު" މަޝްރޫޢު ފެށުމަށްވެސް ވަނީ ހަމަޖެހިފައެވެ. މި މަޝްރޫޢުގެ ދަށުން ނަމާދުގެ މުހިންމުކަން އަންގައިދިނުމާއި، ނަމާދުގެ ދުޢާތަކުގެ މާނަ ދަސްކޮށްދިނުން ފަދަ ކަންކަން ހިމެނޭނެއެވެ.

"ރިސާލަތު" ޕްރޮގްރާމްގެ ދަށުން 2025 ވަނަ އަހަރު އިސްލާމީ އަޚްލާޤު ފެތުރުމަށް މަސައްކަތްކުރާނެ ކަމަށް ވަޒީރު ވިދާޅުވިއެވެ. މި ޕްރޮގްރާމް ބިނާވެފައިވަނީ އިސްލާމްދީނުގެ 5 މަޤްޞަދުގެ މައްޗަށެވެ. ވަޒީރު ވިދާޅުވީ މިއަދު މުޖުތަމަޢުއަށް ވަނީ ރިވެތި އަޚްލާޤު ބޭނުންވެފައި ކަމަށެވެ.

ވުޒާރާގެ 2025 ވަނަ އަހަރުގެ އެކްޝަން ޕްލޭންގައި މުހިންމު ކަންތައްތަކެއް ހިމެނޭކަމަށް ވަޒީރު ފާހަގަކުރެއްވިއެވެ. މި ހުރިހާ މަސައްކަތްތަކަކީވެސް އިސްލާމީ ނޫރު ފަތުރައި، ދީނަށް ލޯބިކުރާ މުޖުތަމަޢެއް އުފެއްދުމަށް ކުރެވޭ މަސައްކަތްތަކެއް ކަމަށް ވަޒީރު ވިދާޅުވިއެވެ.

މި ރަސްމިއްޔާތުގައި ރިސާލަތު ވީޑިއޯ ޗެލެންޖުގައި ބައިވެރިވި ފަރާތްތަކުގެ ތެރެއިން ވަނަވަނައަށް ހޮވުނު ފަރާތްތަކަށް އިނާމު ދެވުނެވެ. ރިސާލަތު ޕްރޮގްރާމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޔާސަތުތަކުގެ ތެރެއިން، އިސްލާމީ ނޫރު ފަތުރާ، ދީނަށް ލޯބިކުރާ މުޖުތަމަޢުއެއް އުފެއްދުމުގެ މަޤުޞަދުގައި ފަށާފައިވާ ޕްރޮގްރާމެކެވެ.