މި އަހަރަކީ ރައްޔިތުން ބާރުވެރިކުރުވައި، ގައުމުގެ ސިޔާދަތު ހިމާޔަތް ކުރެވުނު އަހަރެއް: ރައީސް

މި އަހަރަކީ ރައްޔިތުން ބާރުވެރިކުރުވާ ގައުމުގެ ސިޔާދަތު ހިމާޔަތް ކުރެވުނު އަހަރެއް ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ މިއަހަރުގެ ކާމިޔާބީއާ ގުޅޭގޮތުން ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައެވެ.

ރައީސް ވިދާޅުވި ގޮތުގައި، ޤާނޫނުއަސާސީއަށް ގެނެވުނު އިޞްލާޙުތަކުގެ ސަބަބުން ޤައުމުގެ މުހިންމު ކަންކަމުގައި ރައްޔިތުންގެ ބަސް ހޯދަންޖެހޭ ގޮތަށް ހަމަޖެހިގެން ދިޔުމަކީ ރައްޔިތުންގެ އަތްމައްޗަށް ބާރުވެރިކަން ދިނުން ކަމުގައެވެ.

ޤާނޫނުއަސާސީއަށް ގެނެވުނު މުހިންމު ބަދަލުތަކުގެ ތެރޭގައި، ރާއްޖޭގެ ސަރަޙައްދަށް އެއްވެސް ބަދަލެއް ގެނައުމުގައި އަމަލުކުރާނެ ގޮތް ހިމެނެއެވެ. މިގޮތުން، ރާއްޖޭގެ ސަރަހައްދަށް ބަދަލެއް ގެނެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިންބައިގެ އަޣުލަބިއްޔަތުންނާއި ރައްޔިތުންގެ ފެންނަ ނުފެންނަ ވޯޓަކުންނެވެ.

އިތުރު މުހިންމު ބަދަލެއްގެ ގޮތުގައި، ރާއްޖޭގެ ސަރަޙައްދުގެ އެއްވެސް ބައެއް ބޭރުގެ ފަރާތްތަކަށް އަސްކަރީ ބޭނުމަކަށް ދިނުމުގެ ހުއްދަ ދެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ އަޣުލަބިއްޔަތުން ފާސްކޮށްގެންކަން ފާހަގަކުރެވެއެވެ.

މީގެ އިތުރުން، ޤާނޫނުއަސާސީގައި ރައްޔިތުންގެ ފެންނަ ނުފެންނަ ވޯޓަކަށް ދާން ޖެހޭ މާއްދާ އިސްލާހުކުރާނަމަ، ރައްޔިތުންގެ ރުހުން ހޯދަން ޖެހޭގޮތަށްވެސް ބަދަލު ގެނެވިފައިވެއެވެ. މި އިސްލާހުތަކުގެ ސަބަބުން ކުރިއަށްވުރެ ރަނގަޅަށް ރައްޔިތުންގެ ބާރުވެރިކަން ޔަގީންކުރެވިފައިވާކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.