ހުރިހާ މޮޅެއް އިހަވަންދުއަށް، މެޗްގެ 90 މިނެޓް ހަމަނުކޮށް ހޯރަ ޔުނައިޓެޑް ރަށަށް!

ބޮޑުތިލަދުންމަތީގައި ބާއްވާ އެންމެ އަގުބޮޑު ފުޓުބޯޅަ މުބާރާތް، މައިކަޕްގެ ސެމީ ފައިނަލްގައި ރޭ ބައްދަލު ކުރި ހޯރަ ޔުނައިޓެޑް އަދި އެންވީކޭ ބައްދަލު ކުރި މެޗް 2-0 ގެ ނަތީޖާއަކުން އެންވީކޭ ކާމިޔާބު ކޮށްފިއެވެ.

މެޗްގެ ފަހު ހާފުގައި ރެފްރީ ނިންމި ނިންމުމެއް ހޯރަ ޔުނައިޓެޑުން ބަލައިނުގަނެ، ކުޅުންތެރިންނާއި ސަޕޯޓަރުން ދަނޑަށް އަރާ، ހަމަނުޖެހުން ހިންގަން ފެށުމުން މި މެޗް ކުރިއަށް ނުގެންދެވި ވަނީ ނިންމާލާފައެވެ.

ދަނޑުގައި ގިނަ އަދަދެއްގެ ފުލުހުން ހަރަކާތްތެރިވަމުން ދިޔަނަމަވެސް، މެޗް ކުރިޔަށް ގެންދެވޭނެ ފަދަ މާހައުލެއް ނެތުމުން، މެޗު ހުއްޓައިލިކަން އެންމެ ފަހުން އިޢުލާން ކުރިއެވެ. އަދި މެޗް މެދުކަނޑާލި ހަމައަށް އޮތް ސްކޯއަކީ ފައިނަލް ސްކޯ ކަމަށް ނިންމާ މެޗްގެ މޮޅު ކުޅުންތެރިޔާއަށް ޓްރޮފީ ހަވާލުކޮށްފައިވެއެވެ. މި މެޗްގެ މޮޅު ކުޅުންތެރިއަކަށް ހޮވުނީ އެންވީކޭގެ އައިހަމްއެވެ.

މެޗުގެ ކުޅުން މެދުކަޑައިލީ މެޗްގެ ފަހު ހާފްގެ 29 ވަނަ މިނެޓްގައި، އެންވީކޭގެ ޕެނަލްޓީ އޭރިޔާ ތެރެއިން ކުޅުންތެރިއެއްގެ އަތުގައި ބޯޅަ ޖެހުމުން، ރެފްރީ ޕެނަލްޓީ ނުދިނުމުން އުފެދުނު ހިތްހަމަނުޖެހުމުގެ ތެރޭގައެވެ. 

މި މެޗްގައި ދެ ޓީމަށްވެސް ލަނޑުޖަހާނެ ގިނަ ފުރުޞަތުތަކެއް ލިބިގެން ދިޔައެވެ.

މުބާރާތުގެ ފައިނަލް މެޗްގައި ބައްދަލު ކުރާނީ އިހަވަންދޫގެ ދެ ޓީމް ކަމަށްވާ ކުޅިމަގު އަދި އެންވީކޭއެވެ. މިއާއެކު މުބާރާތުގެ ޓްރޮފީ އަންނަ އަހަރުގެ މައިކަޕްގެ މުބާރާތާ ހަމައަށް އިންނާނީ އިހަވަންދޫގައެވެ. ޗެމްޕިއަންޓީމަށް ކަނޑައެޅިފައިވާ 100،000 ރުފިޔާއާ ރަނަރަޕް ޓީމަށް ކަނޑައެޅިފައިވާ 35،000 ރުފިޔާވެސް ލިބިގެންދާ އިހަވަންދޫ ޓީމަކަށެވެ. މި މުބާރާތުގެ ހުރިހާ މޮޅެއް އޮތީ މިފަހަރު އިހަވަންދޫއަށެވެ.