ބުރިޖު ހައިވޭގައި ތިން ސައިކަލު ޖެހި ފަސް މީހަކަށް އަނިޔާވެއްޖެ

ބުރިޖު ހައިވޭ ފާހަގަ ކުރެވެނީ އެކްސިޑެންޓް ގިނަ ތަނެއްގެ ގޮތުގައި

ބުރިޖު ހައިވޭގައި މާލެއިން ހުޅުމާލެއަށް ދަތުރުކުރަމުންދިޔަ ތިން ސައިކަލު އެކްސިޑެންޓްވެ، ފަސް މީހަކަށް ރޭ އަނިޔާވެފައިވާ ކަމަށް ފުލުހުން މަޢުލޫމާތު ދީފިއެވެ.

މި ހާދިސާ ހިނގައިގެން ފުލުހުންނަށް ރިޕޯޓުކޮށްފައިވަނީ ރޭ 12:11 ގައެވެ.

ފުލުހުން މީޑިއާތަކާ ހިއްސާކުރި މަޢުލޫމާތުގައިވާ ގޮތުން، މި ހާދިސާގައި އަނިޔާވި ފަސް މީހުންގެ ތެރެއިން ހަތަރު މީހަކަށް ފަރުވާ ދިނުމަށްފަހު މިހާރު ވަނީ ހޮސްޕިޓަލުން ދޫކޮށްލާފައެވެ. އެހެންނަމަވެސް، އޭގެތެރެއިން އެކަކަށް އަދިވެސް ޓްރީޓޮޕް ހޮސްޕިޓަލުގައި ފަރުވާ ދެމުން ގެންދެއެވެ. އެ މީހާގެ ހާލަތު ސީރިއަސް ނޫން ކަމަށް ހޮސްޕިޓަލުން މަޢުލޫމާތު ދީފައިވާ ކަމަށް ފުލުހުން ބުނެފައިވެއެވެ.

ފުލުހުން ދެއްވި މަޢުލޫމާތުގައިވާ ގޮތުން، މި އެކްސިޑެންޓް ހިނގަން މެދުވެރިވެފައިވަނީ ސައިކަލު އޯވަރޓޭކް ކުރަން އުޅުމުގެ ތެރޭގައި ދެ ސައިކަލު ޖެހި، ފަހަތުން އައި އެހެން ސައިކަލެއްވެސް ޖެހުމުގެ ސަބަބުންނެވެ. ގަވާއިދާ ޚިލާފަށް ދުއްވި ސައިކަލު މިހާރު ވަނީ ޓޯކޮށްފައެވެ.

ފުލުހުން މިހާރު ދަނީ މި އެކްސިޑެންޓްގެ މައްސަލަ ތަޙުޤީޤުކުރަމުންނެވެ. މި ހާދިސާއާ ގުޅިގެން ބުރިޖު ހައިވޭގައި ދުއްވާއިރު ސަމާލުވުމަށް ފުލުހުން އާންމުންނަށް އިލްތިމާސްކޮށްފައިވެއެވެ. އަދި ޓްރެފިކް ގަވާއިދުތަކަށް ފުރިހަމައަށް ޢަމަލުކުރުމަށް އެންމެހާ އުޅަނދު ދުއްވާ ފަރާތްތަކަށް އިރުޝާދު ދީފައިވެއެވެ.

އެކްސިޑެންޓް ފުލުހުން