ރާއްޖެ އައި ޕްރައިވެޓް ޖެޓުތަކުގެ އަދަދު 8 ޕަސެންޓް އިތުރުވެއްޖެ

މި ދުވަސްވަރަކީ ޕްރައިވެޓް ޖެޓް ރާއްޖެއަށް އެންމެ ގިނައިން އަންނަ ދުވަސްވަރު

ވެލާނާ އިންޓަނޭޝަނަލް އެއަރޕޯޓް (ވީއައިއޭ) އަށް އަންނަ މަތީ ފަންތީގެ ފަތުރުވެރިންގެ ޕްރައިވެޓް ޖެޓުތަކުގެ އަދަދު މިދިޔަ އަހަރާ އަޅާބަލާއިރު 8 އިންސައްތަ އިތުރުވެފައިވާ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މިއަދު ހާމަކޮށްފިއެވެ.

އެމްއޭސީއެލްގެ މަޢުލޫމާތު ދެއްވާ ގޮތުގައި މި މަހު އެކަނި ވެސް 148 ޕްރައިވެޓް ޖެޓު ވީއައިއޭއަށް އައިސްފައިވެއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 8 އިންސައްތައިގެ އިތުރުވުމެކެވެ.

ކޮންމެ އަހަރެއްގެ ވެސް އާ އަހަރާއި ފިނި މޫސުމުގެ ޗުއްޓީއާ ދިމާކޮށް ގިނަ އަދަދެއްގެ ފަތުރުވެރިން ރާއްޖެއަށް ޒިޔާރަތްކުރާ ކަމަށާއި، އޭގެ ތެރޭގައި ޕްރައިވެޓް ޖެޓުތަކުގައި އަންނަ ފަތުރުވެރިންވެސް ހިމެނޭ ކަމަށް އެމްއޭސީއެލްއިން ފާހަގަކޮށްފައިވެއެވެ.

އާ އަހަރުގެ ޗުއްޓީއާ ދިމާކޮށް އެއަރޕޯޓުގެ ބާރު ބޮޑުވެފައިވާތީ، ކުރިއާލާ އެއަރޕޯޓަށް ދިއުމަށް އެމްއޭސީއެލްއިން ވަނީ އިލްތިމާސްކޮށްފައެވެ. އަދި މި ހަފުތާ ތެރޭގައި އެއަރޕޯޓުގެ އޮޕަރޭޝަންތަކަށް ބާރު ބޮޑުވާނެ ކަމަށް ލަފާކުރެވޭތީ، ޕީކު ވަގުތުތަކުގައި އޮޕަރޭޝަންތައް އެންމެ ފުރިހަމައަށް ގެންދިއުމަށް ފަސިންޖަރުންގެ އެއްބާރުލުމަށް އެދިފައިވެއެވެ.

އެމްއޭސީއެލް ފަތުރުވެރިކަން