މާދަމާ އަކީ ބޮޑު ދުވަހެއް! ފައިނަލްގެ ދެ ޖާގަ ކަށަވަރު ކުރުމަށް ހއ ގެ ބޮޑު ދެ ބާރު އިހަވަންދޫއަށް އަރަނީ

އިހަވަންދޫ ޕޯލްސްޓާރ އިން އިންތިޒާމުކޮށްގެން ބޮޑުތިލަދުންމަތީގައި މިހާތަށް ބާއްވާ އެންމެ އަގުބޮޑު ފުޓުބޯޅަ މުބާރާތުގެ ތާރީޙުގައިވެސް މާދަމާ އަކީ ބޮޑު ދުވަހެކެވެ. މައިކަޕްގެ 14 ވަނަ މުބާރާތުގެ ސެމީ ފައިނަލްގެ ދެ މެޗް މާދަމާ ކުޅުމަށް ހަމަޖެހިފައިވާއިރު، ފުރަތަމަ މެޗްގައި މާދަމާ ހަވީރު ބައްދަލު ކުރަނީ ދިއްދޫ ހީވެސް ނުވޭ އާއި އިހަވަންދޫ ކުޅިމަގެވެ. ދިއްދޫ މި މުބާރާތުގެ ސެމީ ފައިނަލްގެ ޖާގަ ކަށަވަރު ކުރީ ޖުމްލަ 9 ޕޮއިންޓާއެކުއެވެ.

ދިއްދޫ ސެމީ ފައިނަލްއަށް ކުރި ދަތުރު:

ދިއްދޫ (ހީވެސްނުވޭ) 2 - ހޯރަފުށި 3

ދިއްދޫ (ހީވެސްނުވޭ)  2 - އުލިގަން 1

ދިއްދޫ (ހީވެސްނުވޭ)  2  - ބީބީ ބްރަދާސް (ނޮޅިވަރަމް)

ދިއްދޫ (ހީވެސްނުވޭ) 3 - ތުރާކުނު 1

މާދަމާގެ ސެމީ ފައިނަލް މެޗާއި ގުޅޭގޮތުން ދެލިއޮންލައިންއާ ވާހަކަ ދައްކަމުން ދިއްދޫ ޓީމުގެ އެސިސްޓެންޓް ކޯޗް މުޙައްމަދު ޒާހިރު ބުނީ، މާދަމާގެ މެޗަށް ޓީމު އޮތީ ވަރަށް ފުރިހަމައަށް ތައްޔާރުވެފައި ކަމަށާއި، މާދަމާގެ މެޗް ކާމިޔާބު ކުރުމަށް އެންމެ ފަހު ކަށިގަނޑާ ހަމައަށް މަސައްކަތް ކުރާނެ ކަމަށެވެ.

ޓީމުގެ އެއްވެސް ކުޅުންތެރިއެއްގެ ބޮޑު އެންޖަރީއެއް ނެތް ކަމަށާއި، ކުޅިމަގު ޓީމަކީވެސް ވަރުގަދަ ޓީމެއް ކަމަށް ދެކޭ ކަމަށް ޒާހިރު ބުންޏެވެ.

ދިއްދޫ ހީވެސް ނުވޭ ޓީމަށް ބަލާއިރު، ޓީމުގައި ހިމެނޭ އެންމެ މުޙިއްމު ކުޅުންތެރިއަކީ ޤައުމީ ޓީމުގެ މަޝްހޫރު ކުޅުންތެރިޔާ ޢަލީ ފާސިރު (ސެންޓޭ)އެވެ. ސެންޓޭ އަކީ ދާދި ފަހުން ބޭއްވި ނައިންޓީ ޕްލަސް ގޯލްޑް ކަޕް އޭދަފުއްޓަށް ކާމިޔާބު ކޮށްދިނުމަށް އެންމެ މުޙިއްމު ދައުރެއް އަދާކުރި ކުޅުންތެރިޔާއެވެ. ސެންޓޭ ވަނީ އެ މުބާރާތުގެ ފައިނަލް މެޗްގެ އެންމެ ފަހު ވަގުތު ގޯލެއް ޖަހައިދީ މުޅި އޭދަފުއްޓަށް އުއްމީދު އާކޮށްދީފައެވެ. މީގެ އިތުރުން އަލިފުއްޓަށް އުފަން އަޙްމަދު ހުޝާމް (ހުސާންޓޭ) ވެސް މާދަމާގެ މެޗުން ފެންނާނެ ކަމަށް ދިއްދޫ ޓީމުން މަޢުލޫމާތު ދެއެވެ.

މުބާރާތުގެ ސެމީ ފައިނަލްގެ ދެވަނަ މެޗްގައި މާދަމާރޭ ބައްދަލު ކުރާނީ ހޯރަފުއްޓާއި އިހަވަންދޫ އެންވީކޭއެވެ. މި މުބާރާތުގެ ސެމީ ފައިނަލަށް ހޯރަފުށި ދަތުރުކޮށްފައިވަނީ ކުޅުނު އެއްވެސް މެޗަކުން ބަލިނުވެ ޖުމްލަ 12 ޕޮއިންޓާއެކު ތާވަލްގެ 1 ވަނައިގައެވެ.

ހޯރަފުށި ސެމީ ފައިނަލަށް ދަތުރު ކުރި ގޮތް:

ހޯރަފުށި 3 - ދިއްދޫ 2  

ހޯރަފުށި 5 - ބީބީ ބްރަދާސް 1

ހޯރަފުށި 3 - ތުރާކުނު 1

ހޯރަފުށި 8 - އުލިގަން 2

ހޯރަފުށި ޓީމަށް ބަލާއިރު ފުޓުބޯޅައިގައި ރާއްޖޭގެ ފެންވަރުގައި ނަން މަޝްހޫރު ގިނަ ކުޅުންތެރިންތަކެއް ހިމެނެއެވެ. އެގޮތުން މާޒިޔާއަށް ކުޅެމުން އަންނަ ހައިޝަމް ފާހަގަކޮށްލެވެއެވެ. އޭދަފުއްޓަށް އުފަން ހައިޝަމް އަކީ ނިމިދިޔަ ގޯލްޑް ކަޕް އެ ރަށަށް ކާމިޔާބު ކޮށްދިނުމަށް މުޙިއްމު ދަޢުރެއް އަދާކުރި ކުޅުންތެރިއެވެ. މީގެ އިތުރުން، ޢަލީ ނާއިމް، ޕޮގްބާގެ އިތުރުން ޝަރީފް ފާހަގަ ކޮށްލެވެއެވެ.

ސެމީ ފައިނަލްގައި މާދަމާ ކުޅޭ އިހަވަންދޫގެ ދެ ޓީމަށް ބަލާއިރު، އެންވީކޭ ސެމީ ފައިނަލަށް ދަތުރު ކުރީ 6 ޕޮއިންޓާއި ފައިދާ 11 ގޯލާއެކު ގުރޫޕުގެ ދެވަނަ ޓީމުގެ ގޮތުގައެވެ. ކުޅިމަގު ސެމީ ފައިނަލަށް ދަތުރު ކުރީ 6 ޕޮއިންޓާއި ފައިދާ 20 ގޯލާއެކު ގުރޫޕުގެ 1 ވަނަ ޓީމުގެ ގޮތުގައެވެ. މާދަމާގެ ސެމީ ފައިނަލްގެ ދެ މެޗްގެ ނަތީޖާ ނިކުންނަ ގޮތުން މުބާރާތުގެ ފައިނަލް މެޗްގައި އިހަވަންދޫ ޓީމެއް ނުފެންނާނެއެވެ. މި މުބާރާތް 13 އަހަރު ބާއްވާފައިވާއިރު، މުބާރާތުގެ ފައިނަލްގައި ރަށުން ބޭރު 2 ޓީމު ކުޅުންޖެހި އިހަވަންދޫގެ ޓީމުތައް "ކުޅިބަލަން" ތިބެން ޖެހިއްޖެ ނަމަ އެއީ އިހަވަންދޫގެ އެއްވެސް ޓީމަކަށް ފަސޭހަ ތަޖުރިބާއަކަށް ނުވާނެއެވެ.

އެހެންކަމުން، މުޅި އިހަވަންދޫ މާދަމާ ނިކުންނާނީ މުބާރާތުގެ ސެމީ ފައިނަލަށް ދަތުރު ކުރި އިހަވަންދޫގެ ދެ ޓީމުގެ ދިފާޢުގައެވެ. އަނެއްކޮޅުން ހއ ގެ ބޮޑު ދެ ބާރު އެ އަންނަނީ މުބާރާތުގެ ތާރީހު ބަދަލުކޮށް އިހަވަންދޫ ދާއިރާއިން ބޭރަށް މި ތަށި ގެންދާށެވެ.

މި މުބާރާތުގެ ޓައިޓަލް ސްޕޮންސަރ އަކީ ބިއުޓިފުލް ބުލޫއެވެ.