މަންމޯހަންގެ ތައުޒިޔާ ދަފްތަރުގައި ރައީސް ސޮއި ކުރައްވައިފި

ރައީސް ޑރ. މުއިއްޒު ތައުޒިޔާގެ ދަފްތަރުގައި ސޮއި ކުރައްވަނީ -- ފޮޓޯ/ ރައީސް އޮފީސް

އިންޑިއާގެ ކުރީގެ ބޮޑުވަޒީރު، ޑދ. މަންމޯހަން ސިންގްގެ ހަނދާނުގައި، ރާއްޖޭގައި ހުންނަ އިންޑިއާގެ ހައިކޮމިޝަނުގައި ހުޅުވާފައިވާ ތައުޒިޔާގެ ދަފުތަރުގައި ރައީސް ޑރ. މުޙައްމަދު މުއިއްޒު ސޮއި ކުރައްވައިފި އެވެ.

ދަފުތަރުގައި ރައީސް ލިޔުއްވި މެސެޖުގައި، ސިންގްއަކީ ތަޖުރިބާކާރު ސިޔާސީ ބޭފުޅެއް ކަމަށާއި، ހާއްސަކޮށް ހިކުމަތްތެރި ނިންމެވުންތަކާ އެކު އެތައް ބައެއްގެ އިހުތިރާމް ހޯއްދަވާފައިވާ ޝަހުސެއްކަން ފާހަގަ ކުރެއްވި އެވެ.

އޭގެ އިތުރުން 2011 ވަނަ އަހަރުގެ ނޮވެމްބަރު މަހު، ސިންގް ރާއްޖެއަށް ކުރެއްވި ތާރީހީ ދަތުރުފުޅުގެ ހަނދާންތައް އައު ކުރައްވައި، އެ ދަތުރުފުޅުގެ ސަބަބުން، ދެ ގައުމުގެ ދެމެދު އޮތް އެކުވެރިކަމުގެ ގުޅުން އިތުރަށް ބަދަހިވެ، އިގުތިސާދީ އަދި އިޖްތިމާއީ ކުރިއެރުމުގެ އުއްމީދު ތަކަށް އިތުރު ހަރުދަނާ ކަމެއް ލިބިގެންދިޔަ ކަމުގައި ރައީސް ފާހަގަ ކުރެއްވި އެވެ.

ރައީސްގެ މެސެޖު ނިންމަވާލައްވާފައި ވަނީ، ފުން ހިތާމައިގެ މި ދަނޑިވަޅުގައި ސިންގްގެ އާއިލާ އަށާއި އިންޑިއާގެ ސަރުކާރާއި ރައްޔިތުންނަށް ހަމްދަރުދީ ފޮނުއްވަމުންނެވެ.

ޑރ. މަންމޯހަން ސިންގް އަވަހާރަވީ މިހިނގާ ޑިސެމްބަރު މަހުގެ 26 ވަނަ ދުވަހު އެވެ.

ރައީސް ޑރ މުޙައްމަދު މުޢިއްޒު