ރާއްޖޭގެ އިގްތިސާދީ ސަރަޙައްދަށް ގަވާއިދާ ޚިލާފަށް ވަދެ އުޅުނީ ލަންކާގެ މަސްބޯޓެއް: އެމްއެންޑީއެފް

ޑްރޯންގެ އެހީގައި ރާއްޖޭގެ ކަނޑުގެ ސަރަހައްދު ބެލެހެއްޓުން

ރާއްޖޭގެ އިގްތިސާދީ ސަރަޙައްދަށް ގަވާއިދާ ޚިލާފަށް ވަދެ އުޅެނިކޮށް ޑްރޯންގެ އެހީގައި ހޯދި ބޭރުގެ މަސްބޯޓަކީ ސްރީ ލަންކާގެ މަސް ބޯޓެއް ކަމަށް އެމްއެންޑީއެފުން މިއަދު ބުނެފިއެވެ.

މި ބޯޓު ފެނުނީ ރާއްޖޭގެ އިގްތިސާދީ ސަރަޙައްދު ބެލެހެއްޓުމަށް ހިންގި އޮޕަރޭޝަނެއްގައި މިދިޔަ ބުރާސްފަތި ދުވަހުގެ ރޭ ކަމަށް އެމްއެންޑީއެފުން މަޢުލޫމާތު ދީފައިވެއެވެ.

އެމްއެންޑީއެފުން ދިން މަޢުލޫމާތުގައިވާ ގޮތުން، މި ބޯޓަކީ ސްރީ ލަންކާއަށް ނިސްބަތްވާ އުޅަނދެއް ކަމަށާއި، އޭގައި ތިބީ ތިން މީހުން ކަމަށް ބުނެފައިވެއެވެ. އަދި މި ބޯޓު ވަނީ މިހާރު ފުލުހުންނާ ޙަވާލުކޮށްފައި ކަމަށްވެސް އެމްއެންޑީއެފުން ހާމަކޮށްފައިވެއެވެ.

މިއީ ފަހަކަށް އައިސް ރާއްޖޭގެ ސަރަޙައްދަށް ގަވާއިދާ ޚިލާފަށް ވަދެގެން އުޅެނިކޮށް ހިފެހެއްޓުނު ފުރަތަމަ އުޅަނދެއް ނޫނެވެ. އެމްއެންޑީއެފުން ވަނީ މިދިޔަ މަހު ވެސް ރާއްޖޭގެ ސަރަޙައްދަށް ގަވާއިދާ ޚިލާފަށް ވަދެ އުޅުނު ބޯޓެއް، ޑްރޯނުގެ އެހީގައި ހޯދާފައެވެ. މީގެ އިތުރުން، ރާއްޖޭގެ ސަރަޙައްދަށް ގަވާއިދާ ޚިލާފަށް ވަދެގެން އުޅުނު ސޯމާލިއާ ޑިންގީއެއް ވެސް މިދިޔަ ހަފްތާގައި ވަނީ ހިފަހައްޓާފައެވެ.

މި ހާދިސާތަކުން ދައްކުވައިދެނީ ރާއްޖޭގެ ކަނޑުގެ ސަރަޙައްދު ބެލެހެއްޓުމަށް އެޅެމުންދާ ފިޔަވަޅުތަކުގެ މުހިންމުކަމެވެ. އަދި ޑްރޯން ފަދަ ޒަމާނީ ޓެކްނޮލޮޖީގެ ބޭނުން ހިފައިގެން ރާއްޖޭގެ ސަރަޙައްދު ބެލެހެއްޓުމުގައި ކުރިއެރުންތަކެއް ލިބެމުންދާކަން ވެސް ފާހަގަކުރެވެއެވެ.

އެމްއެންޑީއެފް