ފަސް މިލިޔަން ގަސް އިންދުމުގެ ޕްރޮގްރާމް: މިހާތަނަށް 450,000 ގަހަށްވުރެ ގިނަ ގަސް އިންދައިފި

ގަސްއިންދުމުގެ ޕްރޮގްރާމަށް ބޮޑު ތަރުހީބެއް ލިބިފައިވޭ

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާންކުރެއްވި ފަސް މިލިޔަން ގަސް އިންދުމުގެ ޕްރޮގްރާމްގެ ދަށުން މިއަހަރުގެ މިހާތަނަށް 450,936 ގަސް އިންދައިފައިވާކަމަށް މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވުޒާރާއިން ހާމަކޮށްފިއެވެ.

މި ޕްރޮގްރާމަކީ ރާއްޖެއިން ނެތެމުންދާ ގަސްތައް އަލުން އާލާކުރުމާއި ފެހިކަން އިތުރުކޮށް މާހައުލީ ނިޒާމު ދެމެހެއްޓުމަށް ފަށާފައިވާ މުހިންމު މަޝްރޫޢެކެވެ. ޕްރޮގްރާމް ފެށިފައިވަނީ މިއަހަރުގެ ޖޫން 5 ވަނަ ދުވަހު، ދުނިޔޭގެ ތިމާވެށީގެ ދުވަހާ ދިމާކޮށެވެ.

ވުޒާރާއިން އިތުރަށް ހާމަކުރި ގޮތުގައި، މިހާތަނަށް 4,219,456 ގަސް އިންދުމަށް 70 ތަނަކުން ޕްލެޖް ލިބިފައިވެއެވެ. މި ޕްރޮގްރާމްގެ ދަށުން އިންދަނީ ރާއްޖެއިން މަދުން ފެންނަ އެކި ބާވަތުގެ ގަސްގަހާގެއްސާއި ހިޔާ ލިބޭ ގަސްގަހާގެހި އަދި ކާނާ ލިބޭ 90 ބާވަތެއްގެ ގަހެވެ.

މާލެއާއި އަތޮޅުތަކުގައިވެސް މި ޕްރޮގްރާމް ދަނީ ކުރިއަށެވެ. ޕްރޮގްރާމްގެ ފުރަތަމަ ދުވަހު އެކަނި 398,000 ގަސް އިންދިކަމަށް ތިމާވެށްޓާބެހޭ ވަޒީރު ޠާރިޤް އިބްރާހީމް ވިދާޅުވެފައިވެއެވެ.

ރައީސް ޑރ. މުޢިއްޒު މި ޕްރޮގްރާމް އިޢުލާންކުރެއްވީ މިދިޔަ އަހަރުގެ ޑިސެންބަރު 1 ވަނަ ދުވަހު ކޮޕް-28 ސަމިޓުގައި ދެއްވި ތަޤުރީރުގައެވެ. މި މަޝްރޫޢަކީ ރާއްޖޭގެ ތިމާވެށި ހިމާޔަތްކޮށް، ދެމެހެއްޓެނިވި ގޮތެއްގައި ތަރައްޤީ ހޯދުމަށް އެޅޭ މުހިންމު ފިޔަވަޅެކެވެ.

ތިމާވެއްޓާއި ބެހޭ ވުޒާރާ