ދެކުނު ކޮރެއާގައި ފްލައިޓެއް ވެއްޓި 62 މީހުން މަރުވެއްޖެ

ދެކުނު ކޮރެއާގެ މުއާން އިންޓަނޭޝަނަލް އެއާޕޯޓަށް މަތިންދާ ބޯޓެއް ވެއްޓި އޭގެން ދަތުރުކުރި 62 މީހުން މަރުވެއްޖެއެވެ.

މި ބޯޓުން ޖުމްލަ 181 މީހުން ދަތުރުކޮށްފައިވާ އިރު މި ބޯޓަކީ ދެކުނު ކޮރެއާގެ ޖެޖޫ އެއާގެ ބޯޓެކެވެ.

ޔޮންހަޕް ނިއުސް އެޖެންސީން ރިޕޯޓުކުރި ގޮތުގައި، ބޯޓު ވެއްޓުނީ އެއާޕޯޓަށް ޖައްސަން އުޅުމުގެ ތެރޭގައި ރަންވޭއިން ކަހާލައިގެން ގޮސް އެއާޕޯޓުގެ ފާރެއްގައި ޖެހުމުންނެވެ. މި ބޯޓުގައި 175 ފަސިންޖަރުންނާއި 6 ފްލައިޓް އެޓެންޑެންޓުން ތިއްބެވެ.

ފަސިންޖަރުންގެ ތެރޭގައި ދެކުނު ކޮރެއާގެ 173 މީހުންނާއި ތައިލެންޑްގެ ދެ މީހުން ހިމެނެއެވެ. މި ބޯޓު ދަތުރުކުރީ ތައިލެންޑްގެ ބެންކޮކުންނެވެ.

ދެކުނު ކޮރެއާގެ ފަޔާ ސާވިސަސްގެ އޮފިޝަލަކު ރޮއިޓާސްއަށް މަޢުލޫމާތު ދެއްވި ގޮތުގައި، މީހުން ސަލާމަތްކުރުމަށް ހިންގަމުން ގެންދާ އޮޕަރޭޝަނުގެ ތެރެއިން މިހާތަނަށް ފްލައިޓް އެޓެންޑެންޓަކާއި އެއް ފަސިންޖަރަކު ދިރިތިބި ހާލު ފެނިފައިވެއެވެ.

ފަޔާ ސާވިސަސްއިން ނެރުނު ބަޔާނެއްގައި ބުނެފައިވަނީ މިހާތަނަށް ބޯޓު ވެއްޓުނު ސަރަޙައްދަށް 80 ފަޔާ ފައިޓަރުންނާއި 30 އަށްވުރެ ގިނަ ފަޔާ ޓްރަކް ފޮނުވާފައިވާ ކަމަށެވެ.