އިސްރާއީލުގެ ބޮޑުވަޒީރުގެ އަނބިމީހާ މައްޗަށް ތަހުގީގު ފަށަން އަމުރު ކޮށްފި

އިންސާފަށް ހުރަސްއެޅި ކަމަށް ބުނެ، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އަނބިމީހާގެ ސާރާ ނަތަންޔާހޫގެ މައްސަލަ ތަޙުޤީޤުކުރަން އިސްރާއީލުގެ އެޓާނީ ޖެނެރަލް ގާލީ ބަހާރަވް-މިއާރާ އެ ގައުމުގެ ފުލުހުންނަށް އަމުރު ކޮށްފިއެވެ.

މި އަމުރު ނެރީ ޗެނަލް 12 ޓީވީން ދެއްކި އުވްޑާ ޝޯގައި ހާމަކުރި މަޢުލޫމާތުތަކާ ގުޅިގެންނެވެ.

އެޓާނީ ޖެނެރަލްގެ ބަޔާނުގައި ބުނެފައިވަނީ މިދިޔަ ހަފުތާގައި ޗެނަލް 12 އިން ދެއްކި ޕްރޮގްރާމުގައި ހާމަކުރި ކަންތައްތަކާ ގުޅިގެން ހެކިންނަށް އުނދަގޫކުރުމާއި އިންސާފަށް ހުރަސް އެޅުމުގެ ޝައްކުކުރެވޭ މައްސަލަތަކުގެ ތަޙުޤީޤެއް ހުޅުވާލަން ޖެހޭ ކަމަށެވެ. އެ ޕްރޮގްރާމުގައި ބުނެފައިވަނީ ނަތަންޔާހޫގެ ޖިނާއީ ޝަރީޢަތުގައި ސާރާ ނަތަންޔާހޫ ހެކިވެރިއަކަށް ބިރުދައްކާ ކަމަށެވެ.

ނަމަވެސް، މި މައްސަލައިގައި ތަޙުޤީޤު ފެށުމަށް އަމުރުކުރުމާ ގުޅިގެން އިސްރާއީލުގެ ބޮޑުވަޒީރު ނަތަންޔާހޫ ވަނީ އޭނާގެ އަންހެނުންގެ ދިފާޢުކުރައްވައި، ޗެނަލް 12 ގެ ރިޕޯޓަކީ އެއް ފަރާތަކަށް ޖެހިފައިވާ އަދި ދޮގު ވާހަކަތައް ހިމެނޭ ރިޕޯޓެއް ކަމަށް ސިފަ ކޮށްފައެވެ. މީގެ އިތުރުން، އިސްރާއީލުގެ ޖަސްޓިސް މިނިސްޓަރު ޔާރިވް ލެވިން އާއި ގައުމީ ސަލާމަތާ ބެހޭ މިނިސްޓަރު އިޓަމާ ބެން ގްވީރު ވެސް ވަނީ އެޓާނީ ޖެނެރަލްގެ މި އަމުރަށް ފާޑުކިޔާފައެވެ.

ނަތަންޔާހޫގެ މައްޗަށް ވަނީ ވަކިވަކި ތިން މައްސަލައެއްގައި ދަޢުވާ އުފުލާފައެވެ. އޭގެ ތެރޭގައި ހިމެނެނީ މަކަރާއި ހީލަތް ހެދުމާއި، އިތުބާރު ގެއްލުމާއި، ރިޝްވަތުގެ ދަޢުވާތަކެވެ. ނަތަންޔާހޫއަކީ މިފަދަ ދަޢުވާތަކެއްގައި ކޯޓަށް ހާޒިރުކުރި އިސްރާއީލުގެ ފުރަތަމަ ބޮޑުވަޒީރެވެ. ނަމަވެސް، ނަތަންޔާހޫ ވަނީ އޭނާގެ މައްޗަށް ކުރާ ތުހުމަތުތައް ތަކުރާރުކޮށް ދޮގުކޮށް، ކުށުގެ ދަޢުވާއަށް އިންކާރުކޮށްފައެވެ.