ނޮވެމްބަރު މަހު އިމްޕޯޓު-އެކްސްޕޯޓުން ދައުލަތަށް 249 މިލިއަން ރުފިޔާ ލިބުނު

ރާއްޖޭގެ އިގުތިޞާދު ކުރިއެރުވުމަށް ސަރުކާރުން ގިނަ މަސައްކަތްތަކެއް ކުރައްވާ

މޯލްޑިވްސް ކަސްޓަމްސް ސަރވިސްއިން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި ނޮވެމްބަރު މަހު އިމްޕޯޓު-އެކްސްޕޯޓުން ދައުލަތަށް 249 މިލިއަން ރުފިޔާ ލިބިފައިވެއެވެ.

ނަމަވެސް މިއީ މިދިޔަ އަހަރުގެ މި މުއްދަތާ އަޅާބަލާއިރު ދަށް އަދަދެކެވެ.

ތެލަށް ކުރި ހޭދަ އުނިކޮށް ބަލާއިރު، މިދިޔަ އަހަރާއި މި އަހަރުގެ ނޮވެމްބަރު މަހުގެ އިމްޕޯޓު ހުރީ އެއްވަރެއްގައެވެ. އެގޮތުން ދެ އަހަރުވެސް 3.4 ބިލިއަން ރުފިޔާގެ މުދާ އިމްޕޯޓުކޮށްފައިވެއެވެ. ނަމަވެސް ތެލަށް ކުރި ހޭދައާއެކު މިދިޔަ އަހަރު 4.3 ބިލިއަން ރުފިޔާގެ މުދާ އެތެރެކޮށްފައިވާއިރު، މި އަހަރު އެތެރެކޮށްފައިވަނީ 4 ބިލިއަން ރުފިޔާގެ މުދަލެވެ.

ނޮވެމްބަރު މަހު ރާއްޖެއަށް އެންމެ ގިނައިން އެތެރެކޮށްފައިވަނީ މެޝިނަރީ އާއި އިލެކްޓްރިކް ސާމާނު، ތެލުގެ ބާވަތްތަކުގެ އިތުރުން ކާބޯތަކެތީގެ ބާވަތްތަކެވެ. އަދި އެންމެ ގިނައިން މުދާ އެތެރެކޮށްފައިވަނީ ޔޫ.އޭ.އީ، ޗައިނާ، އިންޑިއާ، ސިންގަޕޫރު އަދި މެލޭޝިއާއިންނެވެ.

އެކްސްޕޯޓުގެ ދާއިރާއަށް ބަލާއިރު، ރާއްޖެއިން މުދާ އެކްސްޕޯޓުކުރި މިންވަރު ވަނީ ދަށްވެފައެވެ. މިދިޔަ އަހަރުގެ ނޮވެމްބަރު މަހު 216 މިލިއަން ރުފިޔާގެ މަސް ބޭރުކޮށްފައިވާއިރު، މި އަހަރުގެ ނޮވެމްބަރު މަހު އެކްސްޕޯޓު ކުރެވިފައިވަނީ 120 މިލިއަން ރުފިޔާގެ މުދަލެވެ.

މި ތަފާސްހިސާބުތަކުން ދޭހަވަނީ، ރާއްޖޭގެ އިމްޕޯޓު ދާއިރާ ކުރީ އަހަރާ އެއްވަރެއްގައި ހިފެހެއްޓިފައި ހުރި ނަމަވެސް، އެކްސްޕޯޓު ދާއިރާއަށް ނޭދެވޭ އަސަރުތަކެއް ކުރަމުންދާ ކަމެވެ.

ފިނޭންސް މިނިސްޓްރީ