އިންޑިއާގެ ކުރީގެ ބޮޑުވަޒީރު މަންމޯހަން ސިންހް އަވަހާރަވުމާ ގުޅިގެން ރައީސް ތައުޒިޔާ ވިދާޅުވެއްޖެ

އިންޑިއާގެ ކުރީގެ ބޮޑުވަޒީރު ޑރ. މަންމޯހަން ސިންހް (92 އަހަރު) އިއްޔެ އަވަހާރަވުމާ ގުޅިގެން ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތައުޒިޔާ ވިދާޅުވެއްޖެއެވެ.

މަންމޯހަން ސިންހް އަވަހާރަވެފައިވަނީ ވެރިރަށް ނިއުދިއްލީގެ އޯލް އިންޑިއާ އިންސްޓިޓިއުޓް އޮފް މެޑިކަލް ސައިންސަސް (އައިމްސް)ގެ އެމަޖެންސީ ވޯޑުގައި ފަރުވާދެމުންދަނިކޮށެވެ.

މި ހިތާމަވެރި ޚަބަރާ ގުޅިގެން ރައީސް ޑރ. މުޢިއްޒު އެކްސް ގައި  ވިދާޅުވެފައި ވަނީ މި ދަނޑިވަޅުގައި ދިވެހި ރައްޔިތުންނާއި އެމަނިކުފާނު ވަނީ އިންޑިއާގެ ރައްޔިތުންނާއެކު ކަމަށާއި، އަދި މަންމޯހަން ސިންހްގެ އާއިލާއަށާއި އިންޑިއާގެ ރައްޔިތުންނަށް ތައުޒިޔާ ވިދާޅުވާކަމަށެވެ.

ރައީސް ޑރ. މުޢިއްޒުގެ ޕޯސްޓުގައި، 2011 ވަނަ އަހަރު މަންމޯހަން ސިންހް ރާއްޖެއަށް ކުރެއްވި ތާރީޚީ ދަތުރުފުޅަކީ ރާއްޖޭގެ އިޤްތިޞާދަށާއި އިޖުތިމާޢީ ތަރައްޤީއަށް މުހިންމުވެގެންދިޔަ ދަތުރުފުޅެއް ކަމަށް ފާހަގަކުރައްވާފައި ވެއެވެ. މީގެ އިތުރުން މަންމޯހަން ސިންހްގެ "ލުކް އީސްޓް ޕޮލިސީ" އަކީ ދެކުނު އޭޝިއާގެ ތަރައްޤީއަށް މުހިންމު ސިޔާސަތެއްކަންވެސް ރައީސް ޑރ. މުޢިއްޒު ވަނީ ފާހަގަކުރައްވާފައެވެ.

މަންމޯހަން ސިންހްގެ ސިޔާސީ ހަޔާތްޕުޅުގައި އިންޑިއާއަށް ގިނަ ޚިދުމަތްތަކެއް ކުރައްވާފައިވެއެވެ. އޭގެ ތެރެއިން އެމަނިކުފާނު އިންޑިއާގެ ބޮޑުވަޒީރުކަން ކުރެއްވީ 2004 ވަނަ އަހަރުން ފެށިގެން 2014 ވަނަ އަހަރުގެ ނިޔަލަށެވެ. ގިނަ ބަޔަކު ފާހަގަކުރާ ގޮތުގައި އެމަނިކުފާނަކީ އިންޑިއާ މިއަދު މިދެކޭ އިޤްތިޞާދީ ބަދަލު ގެނައުމުގައި ފާހަގަކޮށްލެވޭފަދަ ސިޔާސަތުތަކެއް ތަޢާރަފުކޮށްދެއްވި ބޭފުޅެކެވެ.