ކެބިނެޓަށް ގެނައި ބަދަލާ އެކު އެ މިނިސްޓްރީ ތަކުން ކުރާ މަސައްކަތް ތަކަށް ބަދަލު ގެނެސްފި

ވަޒީރުންގެ މަޖިލީހަށް މިއަދު ގެންނެވި ބަދަލާ ގުޅިގެން، އެ މިނިސްޓްރީތަކުން ކުރަމުން ގެންދަވާ މަސައްކަތްތަކަށް ރައީސް ޑރ މުޙައްމަދު މުއިއްޒު ބަދަލު ގެންނަވައިފި އެވެ.

ރައީސް ގެންނެވި ބަދަލު ތަކަކީ މިއަދު އުވާލެއްވި މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓުން ކުރަމުން ގެންދިޔަ، ރާއްޖޭގެ ބިން ބޭނުން ކުރުމާ ގުޅޭ މަސައްކަތް ތަކާއި، ރާއްޖޭގެ އާބަން ސަރަހައްދުތައް ތަރައްގީ ކުރުމާބެހޭ މަސައްކަތް ތަކާއި، ގައުމީ ތަރައްގީ ރޭވުމާބެހޭ މަސައްކަތްތަކާއި، ތަފާސް ހިސާބުގެ މަސައްކަތްތައް، މިނިސްޓްރީ އޮފް ފިނޭންސް އެންޑް ޕްލޭނިން އިން ކުރަމުން ގެންދާ ގޮތަށް ހަމަޖެއްސެވުމެވެ.

އޭގެ އިތުރުން ރާއްޖޭގެ ހިޔާވަހި ކަމުގެ ސިޔާސަތު ކަނޑައެޅުމާ ބެހޭ އެންމެހައި މަސައްކަތް ތަކާއި، ސޯޝަލް ހައުސިން އާ ބެހޭ އެންމެހައި މަސައްކަތްތައް، މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ އިން ކުރަމުން ގެންދާ ގޮތަށް ރައީސް ވަނީ ހަމަޖައްސަވާފަ އެވެ.

މިއަދާ ހަމައަށް މި މިނިސްޓްރީ ހިންގީ މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާގެ ނަމުގަ އެވެ.

ބަދަލުތަކުގައި އޭގެ އިތުރުން މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓްގެ ދަށުން ހިނގަމުން ދިޔަ، "މޯލްޑިވްސް ބިއުރޯ އޮފް ސްޓެޓިސްޓިކްސް" އަކީ މިއަދުން ފެށިގެން، މިނިސްޓްރީ އޮފް ފިނޭންސް އެންޑް ޕްލޭނިންގެ ދަށުން ހިންގަމުން ދާނެ ތަނެއްގެ ގޮތުގައި ރައީސް ވަނީ ހަމަޖައްސަވާފަ އެވެ.

ސަރުކާރުގެ ބައެއް މިނިސްޓްރީ ތަކުން ކުރާ މަސައްކަތް ތަކަށް ރައީސް ގެންނެވި ބަދަލުތަކާ އެކު، ދައުލަތުގެ އިދާރާ ތަކުން ލިޔާ ސިޓީގައި ނަންބަރު ޖެހުމުގައި، މިނިސްޓްރީ އޮފް ފިނޭންސް އެންޑް ޕްލޭނިން އަށް ލިޔާ ސިޓީގައި ޖަހަމުން ގެންދާނީ، މިހާތަނަށް މިނިސްޓްރީ އޮފް ފިނޭންސަށް ހަމަޖައްސާފައި އޮތް ނަންބަރު 13 ކަމުގައި ވަނީ ކަނޑައަޅުއްވާފައެވެ. އަދި މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ އަށް ލިޔާ ސިޓީގައި ޖަހަމުން ގެންދާނީ، މިހާތަނަށް މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާ އަށް ހަމަޖައްސާފައި އޮތް ނަންބަރު 491 އެވެ.

ވަޒީރުންގެ މަޖިލީހަށް ގެނައި ބަދަލާއި، ބައެއް މިނިސްޓްރީ ތަކުގެ ނަމަށް ގެނައި ބަދަލުތަކާ އެކު ކެބިނެޓަށް އައްޔަން ކުރެއްވި ބޭފުޅުންނަށް މަގާމުގެ ފަތްކޮޅު ދެއްވާފައި ވަނީ ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތުގަ އެވެ.

ކެބިނެޓް މެންބަރު ކަމުގެ ހުވާކުރައްވައި، ހުވައިގެ އިގުރާރުގައި އެ މެންބަރުން ސޮއި ކުރެއްވުމަށް ފަހު ރައީސް ވަނީ އެ ބޭފުޅުންނާ ބައްދަލުކުރައްވައި، މިނިސްޓްރީގެ އޮނިގަނޑު އެކުލަވާލުމުގައި ބަދަލުވާ މުވައްޒަފުންނަށް ދަތި ނުވާނެ ގޮތަށް ކަންކަން ހަމަޖެއްސެވުމަށް އެދިވަޑައިގަންނަވާފަ އެވެ.