ފެނަކައިގެ ކުރީގެ އެމްޑީ ސައީދުގެ މައްޗަށް ދައުވާ ކޮށްފި

ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު އަހުމަދު ސައީދުގެ މައްޗަށް މިއަދު ދައުވާ ކޮށްފި އެވެ.

ޕްރޮސެކިއުޓާ ޖެނެރަލް (ޕީޖީ) އޮފީހުން ބުނީ ސައީދުގެ މައްޗަށް ދައުލަތުން ދައުވާ ކުރީ 2018 އަހަރު ފެނަކަ އާއި ބްލޭޒަން އިންކް ޕްރައިވެޓް ލިމިޓެޑާ ދެމެދު ވެފައިވާ އެއްބަސްވުމުގެ ދަށުން ބްލޭޒަން އިންކް ޕްރައިވެޓް ލިމިޓެޑްގެ ފަރާތުން މަސައްކަތް ފުރިހަމަ ކޮށްފައި ނުވަނީސް އަދި މަސައްކަތް ނިންމިކަން ކަށަވަރު ކުރުމެއް ނެތި، އެ މަސައްކަތަށް ވާ ފައިސާ އެކުންޏަށް ދޫކޮށްފައިވާ މައްސަލައިގައި ކަމަށެވެ.

އެ މައްސަލާގައި ދައުވާ ކުރުމަށް ކްރިމިނަލް ކޯޓަށް ހުށަހެޅީ މިއަދު އެވެ.

ސައީދުގެ އިތުރުން އެ ކުންފުނީގެ ކުރީގެ އިސް ވެރިއެއްގެ މައްޗަށް ވެސް ދައުވާ ކުރި އެވެ.

އެއީ ފެނަކައިގެ އޭރުގެ ޕްރޮކިއުމަންޓް ހެޑް ޏ. ފުވައްމުލައް، ހޯދަޑު، މަރްޔަމް ދީނާ ސޯލިހު އެވެ.

ޕީޖީން ބުނި ގޮތުގައި މި ދެމީހުންގެ މައްޗަށް އުފުލާފައި ވަނީ ގާނޫނުލްއުގޫބާތުގެ ދަށުން، ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ އެވެ.

ސައީދާއި ދީނާގެ މައްޗަށް މިކުށް ސާބިތު ވެއްޖެ ނަމަ އެ ދެމީހުންނަށް ވެސް އެއް އަހަރާ ހަތް މަހާއި ހަ ދުވަހުގެ މުއްދަތަކަށް ޖަލަށްލުމުގެ އަސާސީ އަދަބެއެއް އަންނާނެ އެވެ.

ޕީޖީ އޮފީހުން ބުނީ ފެނަކައިގެ އަމަލުގެ ސަބަބުން 848,000 (އަށް ލައްކަ ސާޅީސް އަށް ހާސް ރުފިޔާ) ގެ ގެއްލުން އެ ކުންފުންޏަށް ލިބިފައިވާ ކަމަށެވެ.