ރައީސް ދެ މިނިސްޓްރީއެއް އެއްކޮށްލައި ކެބިނެޓަށް ބޮޑެތި ބަދަލުތަކެއް ގެންނަވައިފި

ރައީސުލްޖުމުހޫރިއްޔާ ޑރ. މުހައްމަދު މުއިއްޒު ވަޒީރުންގެ މަޖިލީހަށް މިއަދު ބޮޑު ބަދަލެއް ގެންނަވައި، ހައުސިންގ މިނިސްޓްރީއާއި ކޮންސްޓްރަކްޝަން މިނިސްޓްރީ އެއްކޮށްލައްވައިފިއެވެ.

މި ބަދަލާއެކު ސަރުކާރުގެ 22 ވުޒާރާގެ ތެރެއިން އެއް ވުޒާރާ މަދުވެގެން ދިޔައީއެވެ

މި ބަދަލުގެ ދަށުން، ކުރީގެ ހައުސިންގ މިނިސްޓްރީގެ މަސައްކަތްތައް ބަހާލެވިފައިވަނީ ދެ މިނިސްޓްރީއަކަށެވެ. ހައުސިންގ އާއި ކޮންސްޓްރަކްޝަންގެ މަސައްކަތްތައް ހަވާލުކުރެވިފައިވަނީ ޑރ. އަބްދުﷲ މުއްތަލިބާއެވެ. އަދި ޕްލޭނިންގެ މަސައްކަތްތައް ބަދަލުކުރެވިފައިވަނީ ފިނޭންސް މިނިސްޓްރީގެ ދަށަށެވެ.

މި ބަދަލުތަކާއެކު، ކުރީގެ ހައުސިންގ މިނިސްޓަރު ޑރ. އަލީ ހައިދަރު ވަނީ ހަޔަރ އެޑިޔުކޭޝަން މިނިސްޓަރުކަމަށް ބަދަލުކުރެވިފައެވެ. އަދި ކުރީގެ ހަޔަރ އެޑިޔުކޭޝަން މިނިސްޓަރު ޑރ. މަރިޔަމް މާރިޔާ ވަނީ އެގްރިކަލްޗަރ މިނިސްޓަރުކަމަށް ބަދަލުކުރެވިފައެވެ.

ކުރީގެ އެގްރިކަލްޗަރ މިނިސްޓަރު ޑރ. އައިޝަތު ރަމީލާ ވަނީ ސިއްހީ ހާލަތާ ގުޅިގެން މަޤާމުން އިސްތިއުފާ ދެއްވާފައެވެ. އޭގެ ކުރިން އެ މިނިސްޓްރީގެ މަސައްކަތްތައް ވަގުތީގޮތުން ބަލަހައްޓަވަމުން ގެންދެވީ ޑރ. މަރިޔަމް މާރިޔާއެވެ.

މި ބަދަލުތަކަކީ ރައީސް މުއިއްޒު ވަޒީރުންގެ މަޖިލީހަށް ގެންނެވި ފުރަތަމަ ބަދަލުތަކެއް ނޫނެވެ. މީގެ ކުރިންވެސް އެމަނިކުފާނު ވަނީ ބައެއް ވަޒީރުން އެއް މިނިސްޓްރީން އަނެއް މިނިސްޓްރީއަށް ބަދަލުކުރައްވާފައެވެ.