އަޒަރުބައިޖާނުގެ ބޯޓެއް ކަޒަކިސްތާނަށް ވެއްޓި، 38 މީހުން މަރުވެ، 32 މީހުން ސަލާމަތްވެއްޖެ
ބޯޓް ވެއްޓުމާއި ގުޅިގެން 38 މީހުން ވަނީ މަރުވެފައި
އަޒަރުބައިޖާނުގެ ބޯޓެއް ކަޒަކިސްތާނަށް ވެއްޓުނު ހާދިސާގައި މިހާތަނަށް 38 މީހުން މަރުވެފައިވާ ކަމަށް އަލް ޖަޒީރާއިން ރިޕޯޓުކޮށްފިއެވެ. މި ބޯޓުގައި ޖުމްލަ 67 މީހުން ތިބިކަމަށް ވެއެވެ.
ބޯޓު ވެއްޓުނީ ކަޒަކިސްތާނުގެ އަކްތައު ސިޓީއާ ގާތްގަނޑަކަށް ތިން ކިލޯމީޓަރު ދުރަށް، އެމަޖެންސީގައި ޖައްސަން އުޅުމުގެ ތެރޭގައެވެ. އަޒަރުބައިޖާންގެ ޕްރޮސިކިއުޓާ ޖެނެރަލްގެ އޮފީހުން ބުނެފައިވަނީ ބޯޓުގައި ތިބި 67 މީހުންގެ ތެރެއިން 32 މީހުން ސަލާމަތްވެފައިވާ ކަމަށެވެ.
ބޯޓު ވެއްޓުނީ އަޒަރުބައިޖާނުގެ ވެރިރަށް ބާކޫ އިން ރަޝިޔާގެ ސިޓީއެއް ކަމަށްވާ ގްރޮޒްނީ އަށް ދަތުރުކުރަމުން ދަނިކޮށެވެ. ޕްރިލިމިނަރީ ރިޕޯޓްތަކަށް ބަލާއިރު، ގްރޮޒްނީގައި ވަރަށް ބޮޑަށް ދުން ފިނި އުފެދިފައި ހުރުމުގެ ސަބަބުން އެކްސިޑެންޓްގެ ކުރިން އެހެން އެއާޕޯޓަކަށް ބޯޓު ޖެއްސުމަށް އެ ބޯޓުން އެދުނު ކަމަށް ބެލެވެއެވެ.
މި ހާދިސާއާ ގުޅިގެން އަޒަރުބައިޖާނުގެ ރައީސް އިލްހާމް އަލިޔޭވް ވަނީ މިއަދު ބާއްވާ ސަމިޓެއްގައި ބައިވެރިވެވަޑައިގަތުމަށް ރަޝިޔާއަށް ކުރައްވަން ހަމަޖެހިފައިވާ ދަތުރުފުޅު ކުރު ކުރައްވާފައެވެ. އަދި އަޒަރުބައިޖާން އެއާލައިންސްއިން ވަނީ ފަސިންޖަރުންގެ އާއިލާގެ މެމްބަރުންނަށް ގުޅޭނެ ހޮޓްލައިނެއް ގާއިމްކޮށްފައެވެ.
ކޮމެންޓް