ރާއްޖޭގެ ފަތުރުވެރިކަމަށް އުފާވެރި ތާރީޙީ ދުވަހެއް: 2 މިލިޔަން ވަނަ ފަތުރުވެރިޔާއަށް މަރުޙަބާކިޔައިފި

މިއަދަކީ ރާއްޖޭގެ ފަތުރުވެރިކަމަށް އައި އުފާވެރި ތާރީހީ ދުވަހެކެވެ. ރާއްޖެއަށް މިއަހަރު ޒިޔާރަތްކުރި 2 މިލިޔަން ވަނަ ފަތުރުވެރިޔާއަށް ވެލާނާ އިންޓަނޭޝަނަލް އެއަރޕޯޓުގައި ޚާއްޞަ ހަފްލާއެއް ބާއްވައި، ހޫނު މަރުޙަބާއެއް ކިޔައިފިއެވެ.

މި ޝަރަފުވެރި ފަތުރުވެރިޔާގެ ގޮތުގައި ވެގެން ދިޔައީ އޮސްޓްރިއާގެ ރައްޔިތެކެވެ. މިއާއެކު ރާއްޖެއަށް މިއަހަރު ގެނައުމަށް އަމާޒުކޮށްފައިވާ 2 މިލިޔަން ފަތުރުވެރިންގެ އަދަދު ހާސިލުވެ، އައު ރެކޯޑެއް ޤާއިމުކުރެވިފައިވެއެވެ.

މި ޚާއްޞަ ރަސްމިއްޔާތުގައި ފަތުރުވެރިކަމާބެހޭ ވަޒީރު އިބްރާހިމް ފައިސަލާއި، އެމްއެމްޕީއާރުސީގެ މެނޭޖިންގ ޑިރެކްޓަރ އިބްރާހީމް ޝިއުރީއާއި، އެމްއޭސީއެލްގެ މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދުގެ އިތުރުން އިމިގްރޭޝަންގެ އިސްވެރިން ބައިވެރިވެވަޑައިގެންނެވިއެވެ.

ރާއްޖޭގެ ފަތުރުވެރިކަން އިޝްތިހާރުކޮށް، ފަތުރުވެރިންގެ އަދަދު އިތުރުކުރުމަށް ސަރުކާރުން ކުރި ގިނަ މަސައްކަތްތަކުގެ ނަތީޖާއެއްގެ ގޮތުން މިއަހަރުގެ ފެބްރުއަރީ މަހަކީ ރެކޯޑު އަދަދެއްގެ ފަތުރުވެރިން ރާއްޖެއަށް ޒިޔާރަތްކުރި މަހެއްގެ ގޮތުގައި ފާހަގަކުރެވުނެވެ. އެ މަހު 2 ލައްކަ ފަތުރުވެރިން ރާއްޖެއަށް ޒިޔާރަތްކުރިއެވެ.

ސަރުކާރުން އަންނަ އަހަރަށް 2.2 މިލިޔަން ފަތުރުވެރިން ރާއްޖެއަށް ގެނައުމުގެ އަމާޒެއް ކަނޑައަޅާފައިވެއެވެ. މި އަމާޒު ހާސިލުކުރުމަށް އަންނަ އަހަރު ތެރޭގައި ވެލާނާ އިންޓަރނޭޝަނަލް އެއަރޕޯޓުގެ އައު ޓަރމިނަލް ހުޅުވުމުގެ މަސައްކަތް ކުރިއަށްދާކަން ފާހަގަކުރެވެއެވެ.

މި އައު ތަރައްޤީތަކާއެކު، ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރަށް އިތުރުވެ، ފަތުރުވެރިކަމުގެ ދާއިރާއަށް އިތުރު ކުރިއެރުންތަކެއް ލިބޭނެކަމަށް އުއްމީދުކުރެވެއެވެ.