ގެދޮރުވެރިޔާ ސްކީމް މައްސަލައިގައި ދައުވާ ކުރުމާމެދު މަޝްވަރާ ފަށައިފި

ގެދޮރުވެރިޔާ ސްކީމް މައްސަލައިގައި ދައުވާ ކުރުމާމެދު ޕީޖީ، އޭސީސީ ވަނީ މަޝްވަރާ ފަށާފަ -- ފޮޓޯ/ އޭސީސީ

ގެދޮރުވެރިޔާ ސްކީލް މައްސަލައިގައި ދައުވާ ކުރުމާމެދު އެންޓި ކޮރަޕްޝަން ކޮމިޝަން (އޭސީސީ) އިން ޕީޖީ އޮފީހާއެކު މަޝްވަރާ ފަށައިފި އެވެ.

އޭސީސީން ބުނީ އެ އިދާރާއިން ތަހުގީގު ކުރަމުން އަންނަ ގެދޮރުވެރިޔާ ސްކީމްގެ ދަށުން ފުލެޓް ދޫކުރުމުގެ މައްސަލައިގައި ހިމެނޭ ފަރާތްތަކުގެ މައްޗަށް ދައުވާކޮށްދިނުމާ މެދު ގޮތެއް ނިންމުމަށް، ޕީޖީ އޮފީހާއެކު، ރަސްމީކޮށް އެ ކޮމިޝަނުން ޑިއުޓީ ޕްރޮސެކިއުޝަން ފަށާފައިވާ ކަމަށެވެ.

އާންމު މަސްލަހަތު ބޮޑު މި މައްސަލައިގެ، ޑިއުޓީ ޕްރޮސެކިއުޝަންގެ މަރުހަލާ ނިންމައި، ދައުވާ ކުރެވޭނެ ފަރާތްތަކުގެ މައްޗަށް ދައުވާކޮށްދިނުމަށް އެދެން، ކުރަންޖެހޭ މަސައްކަތްތައް އެ ކޮމިޝަނުން ވީ އެންމެ އަވަހަކަށް ކުރަމުން ގެންދާނެ ކަމަށް ވެސް އޭސީސީން ބުންޏެވެ.

ކުރީގެ ސަރުކާރުގައި ހިންގި ގެދޮރުވެރިޔާ ސްކީމްގެ ދަށުން ފުތަމަ ދޭން ނިންމި 4،000 ފްލެޓް ލިބޭ މީހުންގެ ލިސްޓު އާންމު ކުރުން މުއްދަތެއް ނެތް ގޮތަށް ވަނީ ފަސްކޮށްފަ އެވެ. މިއީ ފްލެޓް ލިސްޓު އާންމު ކުރާ ތާރީހު ފަސްކުރި ދެ ވަނަ ފަހަރެވެ.

ހައުސިން މިނިސްޓްރީން ބުނެފައި ވަނީ ފްލެޓަށް އެދި ގެދޮރުވެރިޔާ ސްކީމު އުސޫލުގެ ދަށުން 20،697 އެޕްލިކޭޝަން ފޯމު ހުށަހަޅާފައިވާ ކަމަށެވެ.

ޕީޖީ އޭސީސީ