މިނިސްޓްރީ ތެރެއިން ކޮރަޕްޝަން ހިންގައި ކަމަށް ތުހުމަތުވާ ނަމަ ވަގުތުން އަންގަން އެދެފި

ލޯކަލް ގަވާންމެންޓް މިނިސްޓްރީގެ ތެރެއިން ކޮރަޕްޝަން ހިނގައި ކަމަށް ތުހުމަތު ކުރެވޭ ނަމަ ވަގުތުން އެންގުމަށް މިނިސްޓަރު އާދަމް ޝަރީފް އުމަރު އެދިވަޑައިގެންފި އެވެ.

އެމަނިކުފާނު މިކަމަށް އެދިވަޑައިގެންފައި ވަނީ މިނިސްޓްރީގެ މުވައްޒަފުންނާ ބައްދަލު ކުރައްވަ އެވެ.

އެ ބައްދަލުކުރެއްވުމުގައި އާދަމް ވިދާޅުވީ ކޮރަޕްޝަނާ ދެކޮޅަށް ރައީސް ޑރ. މުއިއްޒު  ކުރައްވާ މަސައްކަތްތަކާ ގުޅިގެން، އެމަނިކުފާނުގެ އިރުޝާދާ އެކު، މިނިސްޓްރީގެ މުވައްޒަފުން ވެސް ކޮރަޕްޝަނާ ދެކޮޅަށް މަސައްކަތްކޮށްދިނުމަށ އިލްތިމާސް ކުރައްވާ ކަމަށެވެ. އަދި ކޮރަޕްޝަނާއި ފަސާދަ އާ ގުޅުން ހުރި އެއްވެސް ކަމަކަށް ތުހުމަތު ވާނަމަ، ވަގުތުން މިނިސްޓަރަށް ރިޕޯޓް ކުރުމަށާއި އަދި އެފަދަ ކަންކަމުގެ މައުލޫމާތު އެންޓި ކޮރަޕްޝަން ކޮމިޝަން (އޭސީސީ)އަށް ހިއްސާ ކުރުމަށް ހިތްވަރު ދެއްވާ، އިލްތިމާސް ކުރެއްވި އެވެ.

މި ބައްދަލުވުމުގައި، ސަރުކާރުން ކޮރަޕްޝަނާ ދެކޮޅަށް ކުރަމުން އަންނަ މަސައްކަތްތައް ފާހަގަކޮށް، ރައީސަށް މިނިސްޓްރީގެ މުވައްޒަފުން ޝުކުރު އަދާ ކުރެއްވި އެވެ.

މި ސަރުކާރުގެ ފުރަތަމަ ދުވަހުން ފަށައިގެން ކޮރަޕްޝަނާ ދެކޮޅަށް އަންނަނީ ހަރުދަނާ ފިޔަވަޅު ތަކެއް އަޅަމުންނެވެ.

ރައީސް ޑރ. މުއިއްޒު ވިދާޅުވީ ސަރުކާރު ތެރޭގައި ކޮރަޕްޝަންގެ އަމަލުތައް ހިންގައި ފަރާތްތަކާ މެދު ގާނޫނީ ފިޔަވަޅު އަޅުއްވާނެ ކަމަށެވެ. އަދި ސަރުކާރުގެ މަތީ މަގާމު ތަކަށް މީހުން އައްޔަން ކުރަނީ ކޮރަޕްޝަން ހިންގައި ވައްކަން ކުރަން ނޫންކަމަށް ވެސް ރައީސް ވިދާޅުވެފައިވެ އެވެ.

އޭގެ އިތުރުން ކުރީގެ ސަރުކާރު ތަކުގައި ކޮރަޕްޝަންގެ މައްސަލަ ތަކުގައި ފިޔަވަޅު ނާޅާ ދޫކޮށްލިއެއް ކަމަކު މި ސަރުކާރުން އެގޮތަށް ކަންތައްތައް ނުކުރާނެ ކަން ފާހަގަ ކުރައްވައި ރައީސް ދެއްވާފައި ވަނީ ކޮރަޕްޝަނަށް މަގުފަހިވާ ގޮތަށް އެއްވެސް ކަމެއް ކުރާ ނަމަ، ފިޔަވަޅު އަަޅުއްވާނެ ކަމުގެ ޔަގީން ކަމެވެ.