އެޗްޑީސީގެ ބިމާއި ފްލެޓު މައްސަލަ: 20 މީހެއްގެ އިލެކްޓްރޯނިކް ސާމާނު ފުލުހުން ހިފަހައްޓައިފި

އެޗްޑީސީގެ ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް ގޯތި ދޫކުރި މައްސަލައިގައި ޕާސްޕޯޓް ހިފެހެއްޓި 20 މީހުންގެ އިލެކްޓްރޯނިކް ސާމާނުތައް ފުލުހުން ހިފަހައްޓައިފިއެވެ.

މީގެ ތެރޭގައި އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދާއި އޭނާގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނެއެވެ.

މި މައްސަލަ ފެށުނީ މިދިޔަ ހަފްތާގައި ސޯޝަލް މީޑިއާގައި އެޗްޑީސީއާ ގުޅޭ ބޮޑެތި ތުހުމަތުތަކެއް ކުރެވި، ފަޒުލްގެ ބޭބެ ފަޒީލްއަށް ބިމެއް ދިންކަމުގެ މައްސަލަ ތިލަވުމާ ގުޅިގެންނެވެ. މި މައްސަލަ ފެންމަތިވުމާ އެކު ފަޒުލް ވަނީ ސަސްޕެންޑްކޮށްފައި ހުންނަވަނިކޮށް މިދިޔަ ހޮނިހިރު ދުވަހު މަގާމުން އިސްތިއުފާ ދެއްވާފައެވެ.

ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނެފައިވަނީ ޕާސްޕޯޓް ހިފެހެއްޓި އެންމެންގެ އިލެކްޓްރޯނިކް ސާމާނުތައް ކޯޓު އަމުރެއްގެ ދަށުން ނަގާފައިވާ ކަމަށެވެ. ނަމަވެސް ހިފެހެއްޓި ތަކެތީގެ އަދަދާއި ބާވަތްތަކުގެ ތަފްސީލު އަދި ހާމަކޮށްފައެއް ނުވެއެވެ.

މި މައްސަލައިގައި އެޗްޑީސީގެ ޗެއާމަން ފިޔަވާ ބޯޑުގެ އެހެން ހުރިހާ މެންބަރުން ސަސްޕެންޑްކުރުމަށް ފަހު މިހާރު ވަނީ އެ ސަސްޕެންޝަން އުވާލާފައެވެ. އަދި އެ ކުންފުނީގެ އިސް 15 މުވައްޒަފުން ވަޒީފާއިން ވަކިކޮށްފައި ތިއްބާ އަލުން މިއަދު ވަނީ ވަޒީފާ ދީފައެވެ. ނަމަވެސް މި މުވައްޒަފުން މިވަގުތު ތިބީ ސަސްޕެންޝަންގައެވެ.

މި މައްސަލައިގެ ތަޙުޤީޤު ކުރިއަށްދާއިރު، ފުލުހުން ވަނީ ފަޒުލް ދިރިއުޅޭ ތަން ބަލައި ފާސްކޮށް، ބައެއް އިލެކްޓްރޯނިކް ސާމާނު ގެންގޮސްފައެވެ. މީގެ އިތުރުން ފަޒީލްގެ ފޯނު ވެސް ފުލުހުން ވަނީ ކޯޓު އަމުރެއްގެ ދަށުން މިއަދު ހިފަހައްޓާފައެވެ.