ގޯލްޑް ކަޕުން ދިވެހި ފުޓުބޯޅައިގެ ރޫޙު އާލާވެއްޖެ: ނައިބު ރައީސް

ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ޗެމްޕިއަންޓީމް ބ.އޭދަފުށި

ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގައި ރާއްޖޭގެ އެކި ކަންކޮޅުތަކުން ބައިވެރިވި ޓީމުތަކާއި، އެ ޓީމުތަކުގެ ސަޕޯޓަރުން ދިވެހި ފުޓުބޯޅައިގެ ރޫޙު އަލުން ދިރުވައިދީފި ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެ އެވެ.

ނައިބު ރައީސް މިހެން ވިދާޅުވީ ނައިންޓީ ޕްލަސް ގޯލްޑް ކަޕް 2024 ކާމިޔާބުކުރި ބ.އޭދަފުށީގެ ޓީމަށް ތަހުނިޔާއާއި މުބާރިކުބާދީ އަރިސްކޮށް ސޯޝަލް މީޑިއާގައި ކުރެއްވި ޕޯސްޓެއްގައެވެ. މި ޕޯސްޓުގައި ނައިބު ރައީސް ވަނީ އޭދަފުށި ޓީމުގެ ކުޅުންތެރިން ދެއްކި ހުނަރަށް ސާބަސް ދަންނަވާފައެވެ. އަދި އައްޑޫ ސިޓީގެ ޓީމުން މުބާރާތުގައި ދެއްކި މޮޅު ކުޅުމާއި ކުރި ހިތްވަރުވެސް ވަނީ ފާހަގަކުރައްވާފައެވެ.

"ދެ ޓީމުގެ ސަޕޯޓަރުންވެސް މިރޭ ގަލޮޅު ދަނޑަށް އައު ދިރުމެއް ގެނުވައިފި. މި މުބާރާތުގައި ރާއްޖޭގެ އެކި ކަންކޮޅުތަކުން ބައިވެރިވި ޓީމުތަކާއި އެ ޓީމުތަކުގެ ސަޕޯޓަރުން ދިވެހި ފުޓުބޯޅައިގެ ރޫޙު އަލުން ދިރުވައިދީފި" ނައިބު ރައީސް ވިދާޅުވިއެވެ.

މީގެ އިތުރުން ނައިބު ރައީސް ވަނީ ކާމިޔާބުކަމާއެކު މި މުބާރާތް ނިންމާލުމުން އެކަން ފާހަގަކޮށް މުބާރާތް އިންތިޒާމުކުރެއްވި ފަރާތްތަކަށް ޝުކުރުއަދާކުރައްވާފައެވެ. "މި ފުރުޞަތުގައި ގޯލްޑް ކަޕް 2024 އިންތިޒާމު ކުރުމުގައި ޙަރަކާތްތެރިވި ފަރާތްތަކުން ކުރި މަސައްކަތް ފާހަގަކޮށް ޚާއްޞަ ޝުކުރެއް ދަންނަވަން" ނައިބު ރައީސް ވިދާޅުވިއެވެ.

ނައިބު ރައީސް ޙުސައިން މުޙައްމަދު ލަތީފް