ޑުރަގް ކޯޓަށް ލަފާދޭ ޓެކްނިކަލް ކޮމިޓީއަށް 11 މެންބަރުން އައްޔަނުކޮށްފި

ނޭޝަނަލް ޑްރަގް އޭޖެންސީ (އެންޑީއޭ) އިން ޑްރަގް ކޯޓަށް ލަފާދިނުމަށް އެކުލަވާލަންޖެހޭ ޓެކްނިކަލް ކޮމިޓީއަށް 11 މެންބަރުން އައްޔަނުކޮށްފިއެވެ.

މި ކޮމިޓީ އެކުލަވާލާފައިވަނީ މިދިޔަ އޮކްޓޯބަރު 30 ގައެވެ.

ކޮމިޓީގެ ޗެއަރޕާސަނަކީ އެންޑީއޭގެ ޑެޕިއުޓީ ޑިރެކްޓަރ ޖެނެރަލް އަބްދުﷲ ފަސީހެވެ. އަދި ވައިސް ޗެއަރޕާސަނަކީ ކައުންސިލަރ ޝަމާ ނަސީރެވެ. މީގެ އިތުރުން ކޮމިޓީގައި ހިމެނެނީ އެންޑީއޭގެ އެކި މަޤާމުތަކުގައި ތިބި މުވައްޒަފުންނެވެ.

ޓެކްނިކަލް ކޮމިޓީގައި ހިމެނެނީ:

• ޗެއާޕާސަން - އެންޑީއޭގެ ޑެޕިއުޓީ ޑިރެކްޓަރު، ޖެނެރަލް އަބްދުﷲ ފަސީހް

• ވައިސް ޗެއާޕާސަން - ކައުންސިލަރު، ޝަމާ ނަސީރު

• އެސިސްޓެންޓް ޑިރެކްޓަރު - އާއިޝަތު ޝިއުނާ

• އެސިސްޓެންޓް ޑިރެކްޓަރު - އަލީ ރިޔާޒު

• އެސިސްޓެންޓް ޑިރެކްޓަރު - ފާތިމަތު ސާނިހާ ސޯލިހް

• ލީގަލް އޮފިސަރު - އަހްމަދު ހިލްމީ

• ސީނިއާ ޕްރޮގްރާމް ކޯޑިނޭޓަރު - ހައްވާ އަގުލާ އަހްމަދު

• ޕްރޮގްރާމް އޮފިސަރު - މަރިޔަމް އާދަމް

• އެސިސްޓެންޓް ކައުންސިލަރު - އަހްމަދު ފިރާގް

• އެސިސްޓެންޓް ކައުންސިލަރު - އާމިނަތު ރިޔާޒާ

• ޑިރެކްޓަރު - މަރިޔަމް އަސްރާ

މި ޓެކްނިކަލް ކޮމިޓީއަކީ ޤާނޫނުގައި ބަޔާންކޮށްފައިވާ ގޮތުގެ މަތިން އެންޑީއޭއިން ޑްރަގް ކޯޓަށް ލަފާދިނުމަށް އެކުލަވާލަންޖެހޭ ޓީމެކެވެ. ޤާނޫނުގައި ބުނެފައިވާ ގޮތުން، މިފަދަ ޓީމުތަކުގެ ޚިދުމަތް މެދުކެނޑުމެއްނެތި ޑްރަގް ކޯޓަށް ލިބޭނެ އިންތިޒާމު އެންޑީއޭއިން ހަމަޖައްސަންޖެހެއެވެ.

އެންޑީއޭގެ އެއް މަސްއޫލިއްޔަތަކީ މަސްތުވާތަކެތީގެ މައްސަލަތައް ބެލުމުގައާއި އަދަބު ކަނޑައެޅުމުގައި އަދި ފަރުވާގެ ޕްރޮގްރާމްތައް ކަނޑައެޅުމުގައި ޑްރަގް ކޯޓަށް ލަފާދިނުމެވެ.

ޑްރަގް ކޯޓުން އަހަރަކު އެއްފަހަރު ރިޕޯޓެއް އެކުލަވާލައި، އެ ކޯޓަށް ހުށަހެޅޭ މައްސަލަތަކާއި ނިމޭ ގޮތުގެ މަޢުލޫމާތު ޑްރަގް ކައުންސިލަށް ހުށަހަޅަންޖެހެއެވެ. މި ރިޕޯޓުގައި މައްސަލަތައް ނިންމުމަށް ހޭދަވާ ވަގުތާއި އިދާރީ ގޮތުން ހުރި ދަތިތައްވެސް ހިމަނަންޖެހެއެވެ.