ޒަކާތު ފަންޑުގެ އެހީގައި ގައްޒާގެ ރައްޔިތުންނަށް ބޯފެން ފޯރުކޮށްދީފި

ޒަކާތުފަންޑުގެ އެހީގައި ބޯފެން ފޯރުކޮށްދިނުމުގެ މަސައްކަތް ކުރިއަށް ދަނީ

ދިވެހިރާއްޖޭގެ ޒަކާތު ފަންޑުން ފަލަސްތީނުގެ ޣައްޒާގައި ހާލުގައި ޖެހިފައިވާ ރައްޔިތުންނަށް ބޯފެން ފޯރުކޮށްދިނުމުގެ މަސައްކަތް ފަށައިފިއެވެ.

މިކަމަށް ޒަކާތު ފަންޑުން ހަދިޔާކުރި އެއް ލައްކަ ޑޮލަރު ވަނީ ގަތަރު ރެޑް ކްރެސެންޓް ސޮސައިޓީއާ ހަވާލުކޮށްފައެވެ.

މި މަޝްރޫޢުގެ ދަށުން މިހާތަނަށް ޣައްޒާގެ އަލްޝިފާ ހޮސްޕިޓަލާއި އަލް ހަޔާތު ހޮސްޕިޓަލުގައި ތިބި ހާލުގައި ޖެހިފައިވާ މީހުންނަށް 6,000 ކޭސް ފެން ބަހާފައިވެއެވެ. އަދި ޖުމުލަ 60,000 ރައްޔިތުންނަށް 50,000 ކޭސް ފެން ބެހުމަށް ވަނީ ރޭވިފައެވެ.

މިއީ ޒަކާތު ފަންޑުން ރާއްޖެއިން ބޭރުގެ ފަރާތަކަށް އެހީތެރިކަން ފޯރުކޮށްދޭ ފުރަތަމަ ފަހަރެވެ. މި އެހީތެރިކަން ފޯރުކޮށްދެނީ ރައީސް ޑރ. މުޙައްމަދު މުޢިއްޒުގެ އިރުޝާދުގެ ދަށުންނެވެ.

މި ސަރުކާރުން ވަނީ ޒަކާތު ހައުސްގެ ނަމުގައި ވަކި އިދާރާއެއް އުފައްދާފައެވެ. މީގެ މަޤްޞަދަކީ ޒަކާތާ މެދު މީހުން އަހުލުވެރިކުރުވައި ލޯބި ޖެއްސުމެވެ.

މީގެ އިތުރުން، "ފަލަސްތީނާ އެކު ދިވެހީން" ނަމުގައި ބޭއްވި ޓެލެތޯނަކުން 19 މިލިއަން ރުފިޔާ އެއްކުރެވި، އެ ފައިސާ ވެސް ވަނީ އދ. ގެ އަންރުވާއާ ހަވާލުކޮށްފައެވެ.

ފަލަސްތީން ޒަކާތު ފަންޑު