ހޮސްޕިޓަލާއި ސިއްހީ މަރުކަޒު ތަކަށް ދިވެހި 50 ނަރުހުން ހޯދަނީ

ހއ. އަތޮޅު ހޮސްޕިޓަލާއި އެ އަތޮޅުގެ ބައެއް ސިއްހީ މަރުކަޒު ތަކަށް 50 ރެޖިސްޓަޑް ނަރުހުން ހޯދަން އިއުލާންކޮށްފި އެވެ.

މީގެ ތެރެއިން 12 ނަރުހުން ހޯދަނީ ހއ. އަތޮޅު ހޮސްޕިޓަލަށެވެ. އަނެއް 38 ނަރުހުން ސިއްހީ މަރުކަޒު ތަކަށެވެ. މިއީ ދާއިމީ މަގާމު ތަކެކެވެ.

އެގޮތުން ހއ. އަތޮޅު ހޮސްޕިޓަލަށް 12 ނަރުހުން، ހަމަ އެ ރަށު ސިއްހީ މަރުކަޒަށް ހަ ނަރުހުން، މުރައިދޫ ސިއްހީ މަރުކަޒަށް ދެ ނަރުހުން، ތަކަންދޫ ސިއްހީ މަރުކަޒަށް ހަ ނަރުހުން، ހޯރަފުށީ ސިއްހީ މަރުކަޒަށް ހަތަރު ނަރުހުން ބޭނުންވެ އެވެ.

އޭގެ އިތުރުން ތުރާކުނު ސިއްހީ މަރުކަޒަށް ނަރުހަކާއި އުލިގަމް، މޮޅަދޫ ސީއްހީ މަރުކަޒަށް ދެ ނަރުހުން، ކެލާ ސިއްހީ މަރުކަޒަށް އަށް ނަރުހުން، ވަށަފަރު ސިއްހީ މަރުކަޒަށް ތިން ނަރުހުން، ފިއްލަދޫ ސީއްހީ މަރުކަޒަށް ދެ ނަރުހުން އަދި މާރަންދޫ، އުތީމު ސިއްހީ މަރުކަޒަށް އެއް ނަރުހަކު ހިމެނެ އެވެ.

މި މަގާމް ތަކަށް އެދޭ ފަރާތް ތަކުން ފުރިހަމަކޮށްފައިވާ ވަޒީފާއަށް އެދޭ ފޯމާއި، ވަނަވަރު، އައިޑީ ކާޑު، އަދި އިތުރު ލިޔެކިޔުންތައް މި ޑިސެމްބަރު 31 ވަނަ ދުވަހު 1:00ގެ ކުރިން ހއ. އަތޮޅު ހޮސްޕިޓަލްގެ އިދާރީ އޮފީހަށް ހުށަހެޅުމަށް އެ ހޮސްޕިޓަލުން ވަނީ އެދެފަ އެވެ.

ވަޒީފާއަށް އެދޭ ފޯމާއި ލިޔުންތައް އީމެއިލް  hr@haah.gov.mv މެދުވެރިކޮށް ވެސް ބަލައިގަންނާނެ އެވެ.