ސްޓޭޓް މިނިސްޓަރު ނިހާދު އެ މަގާމުން ސަސްޕެންޑް ކޮށްފި

ޓޫރިޒަމް މިނިސްޓްރީގެ ސްޓޭޓް މިނިސްޓަރު މުޙައްމަދު ނިހާދު އެ މަގާމުން މިއަދު ސަސްޕެންޑުކޮށްފި އެވެ.

އޭނާ ސަސްޕެންޑްކުރި ވަކި ސަބަބެއް ރައީސް އޮފީހުން ހާމައެއް ނުކުރެ އެވެ.

ބެލެވޭ ގޮތުގައި ނިހާދު ސަސްޕެންޑްކޮށްފައި ވަނީ ކޮންގްރެސް ހައުސް، ހ. ވެޔޮވިލާ، ގައި ރޭ ބޭއްވި ހަރުގެ ޖަލްސާގައި ރާއްޖޭގެ ބައެއް ރިސޯތު ތަކަށް އަމާޒުކޮށް އިދިކޮޅު އެންޑީޕީން އިސް ނަގައިގެން ޓެރެރިސްޓް ހަމަލާއެއް ދޭން ރާވާ ކަމަށް ތުހުމަތުކޮށް ދެއްކެވި ވާހަކަތާ ގުޅުވައިގެންނެވެ.

ނިހާދު ވިދާޅުވެފައި ވަނީ އަންނަ ބުރާސްފަތި ދުވަހުގެ ނިޔަލަށް ރާއްޖެއަށް ދެ މިލިއަން ފަތުރުވެރިން ގެނައުމަށް ސަރުކާރުން ކުރަމުން އަންނަ މަސައްކަތް ހުއްޓުވަން އިދިކޮޅުން މަސައްކަތް ކުރަމުން އަންނަ  ކަމަށެވެ.

މިކަން ކުރަން ރާވާފައި ވަނީ އިއްޔެ ހަވީރުކަން ފާހަގަކޮޮށް ނިހާދު ވިދާޅުވީ އެކަމުގެ އަޑީގައި ހުރީ އެމްޑީޕީގެ ޗެއާޕާސަން ފައްޔާޒު އިސްމާއިލް ކަމަށެވެ.

"އަންނަ ބުރާސްފަތި ދުވަހު އިރާދަކުރެއްވިއްޔާ ދެ މިލިއަން ފަތުރުވެރިން ރާއްޖޭގައި ތިބޭނެ. އެކަމާ އަދުގެ ސަރުކާރުން ކުރަމުންދާ މަސައްކަތް ހުއްޓުވައި، މި ދިވެހި ދައުލަތަށް ތިޔަ ރައްޔިތުންނަށް ކުރަން ހުރި މަސައްކަތްތަކަށް ހުރަސް އެޅުމަށް ބޭރުން އަޅުގަނޑުމެންނަށް ލިބިދާނެ މަންފާއެއް ފައިސާގެ އެހީއެއް ނޫނީ ހުރި ބޮޑެތި އިންވެސްޓްމަންޓްތައް ހުއްޓުވުމަށް ރާވާފައިވާ ބޮޑު ޓެރެރިޒަމްގެ ހަމަލާއެއް. މި ކަމުގައި ބައިވެރިވަނީ ހަމަ ސީދާ ކަނޑައެޅިގެން މި ރާއްޖޭގެ އިގުތިސޯދު ފުޑާލުމަށް މީގެ ކުރީގައި ވެސް މަސައްކަތް ކޮށްފައިވާ އެމްޑީޕީ. އެ ލީޑާޝިޕްގެ ބްރޯ،" ޖަލްސާގައި ނިހާދު ވިދާޅުވި އެވެ.

ނިހާދުގެ އެ ވާހަކަތަކާ ގުޅުވައިގެން ގިނަ ބައެއްގެ ފާޑުކިޔުން އޭނާއަށް އަމާޒުވަމުން އަންނައިރު، ރާއްޖޭގެ އެންމެ ބޮޑު އިދިކޮޅު ސިޔާސީ ޕާޓީ އެމްޑީން ވެސް ވަނީ އެ ވާހަކަ ތަހުގީގު ކުރުމަށް ގޮވައިލައިފަ އެވެ.